Senat Azııa keńesine qatysty mańyzdy qujatty maquldady
ASTANA. KAZINFORM — Búgin Senattyń jalpy otyrysynda Azııa keńesine qatysty tıimdiligin jaqsartýǵa baǵyttalǵan qujat talqylandy.
Palata otyrysynda senatorlar «2007 jylǵy 26 maýsymdaǵy Qazaqstan Úkimeti men Azııadaǵy ózara is-qımyl jáne senim sharalary jónindegi keńestiń Hatshylyǵy arasyndaǵy Hatshylyqtyń Qazaqstan aýmaǵynda bolýy sharttary týraly kelisimge ózgerister engizý týraly hattamany ratıfıkatsııalaý týraly» Zańdy maquldady.
Bul hattamaǵa 2024 jylǵy 15 qarashada Astana qalasynda qol qoıyldy.
— Bul zań Azııadaǵy ózara is-qımyl jáne senim sharalary jónindegi keńesti tolyqqandy halyqaralyq uıymǵa transformatsııalaý týraly Qazaqstan Prezıdenti Qasym-Jomart Toqaevtyń tapsyrmasy boıynsha jáne 2022 jylǵy qazanda Astanada ótken Azııa Keńesiniń 6-shy Sammıtiniń sheshimi negizinde ázirlengen. Shtab-páteri Astanada ornalasqan, qurylǵaly beri óziniń tıimdiligin dáleldep kele jatqan Azııa keńesine 28 memleket múshe, bul — Azııa qurlyǵynyń 90 paıyzyn quraıdy. Sondyqtan Qazaqstan keńestiń negizin qalaýshy memleket retinde Uıymnyń jalpy qyzmetin, sonyń ishinde atqarýshy organy — Hatshylyq jumysyn jaqsartýǵa erekshe mán berip keledi, — dedi senator Darhan Qydyráli.
Hattamaǵa engizilgen ózgerister Birikken Ulttar Uıymynyń jáne ózge de halyqaralyq uıymdardyń erejeleri men tájirıbesine sáıkes, múshe memleketterden Hatshylyqqa jumysqa jiberiletin nemese kelisimshart negizinde qyzmet atqaratyn personal músheleriniń mártebesin nyǵaıtýdy kózdeıdi.
— Azııa Keńesi sııaqty úkimetaralyq nemese memleketaralyq uıymǵa múshe árbir memleket, ásirese qabyldaýshy tarap, qyzmetkerlerdiń fýnktsııalary men táýelsizdiginiń halyqaralyq sıpatyn tanýdy, qurmetteýdi jáne saqtaýdy irgeli qaǵıda retinde qabyldaýy tıis ekeni belgili. Bul qaǵıda qyzmetkerdiń azamattyǵyna qaramastan óz qyzmettik mindetterin atqarý barysynda qabyldaýshy eldiń ıýrısdıktsııasynan ımmýnıtetke ıe bolýyn, memlekettiń jeke tabys salyǵynan bosatylýyn jáne basqa da birqatar artyqshylyqtarmen qamtamasyz etilýin kózdeıdi. Jalpy, Hatshylyqtyń Qazaqstan aýmaǵynda bolýy sharttary týraly Kelisimge 32 ózgeris engizý qarastyrylǵan. Olardyń 13-i — Hatshylyq personalyna «halyqaralyq azamattyq qyzmetshi» fýnktsııalaryn berý, qalǵan 19-y — redaktsııalyq túzetýler, — dedi depýtat.
Onyń aıtýynsha, qazirgi geosaıası aýmaly-tókpeli kezeńde Azııa keńesi óziniń tıimdiligimen burynǵydan da joǵary suranysqa ıe bolyp otyr. Osyǵan oraı, qabyldanatyn zań Uıym qyzmetkerleriniń eńbek jaǵdaılaryn halyqaralyq standarttarǵa sáıkestendirip, Azııa keńesin tolyqqandy halyqaralyq uıymǵa aınaldyrýǵa oń áser beredi jáne onyń áleýetin odan ári arttyrady.
Buǵan deıin AÓSShK-ge múshe elder qarjy salasyndaǵy yntymaqtastyqty nyǵaıta túsetinin jazǵan edik.