Senat Ázerbaıjandaǵy qazaqstandyqtardyń múddelerin qorǵaýǵa arnalǵan qujatty qabyldady

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisimge 2019 jyly 14 qazanda Baký qalasynda Qazaqstan men Ázerbaıjan Іshki ister mınıstrleri qol qoıdy.

«Kelisimdi ratıfıkatsııalaý kóshi-qon aǵyndaryn retteý, azamattyq máselelerin sheshý jáne zańsyz kóshi-qon jelilerin anyqtaý úshin qolaıly jaǵdaılar jasaıdy. Naqtyraq aıtsaq, statıstıka men aqparat almasýǵa múmkindik jasalady, azamattar týraly jeke aqparat alýǵa bolady. Eki el úkimetteri tájirıbe almasyp, bir-birine praktıkalyq kómek kórsetedi. Qazaqstan men Ázerbaıjan azamattarynyń quqyqtyq mártebesi anyqtalady. Kóshi-qon salasyndaǵy qylmystarmen kúresip, zańsyz kanaldardy joıýǵa bolady. Qazaqstan men Ázerbaıjan memleketterinde zań boıynsha qos azamattyq joq», - dedi QR Іshki ister mınıstriniń birinshi orynbasary Marat Qojaev.

Onyń aıtýynsha, osy zańdy qabyldaý azamattyq máseleleri boıynsha aqparatpen almasý, qos azamattyq jáne zańsyz kóshi-qonǵa qarsy kúreste týyndaǵan máselelerin retteýge múmkindik beredi. Áleýmettik-ekonomıkalyq, jáne quqyqtyq teris saldarǵa ákep soqpaıdy, jáne qosymsha qarajatty talap etpeıdi.

Óz kezeginde Senat tóraǵasy Máýlen Áshimbaev Qazaqstan men Ázerbaıjan memleketteri arasyndaǵy qarym-qatynas tarıhy tereń baýyrlastyq pen dostyqqa negizdelgenin atap ótti.

«Qazirgi tańda ortaq teńiz shekarasy, saýda-ekonomıkalyq jáne mádenı baılanystar ekijaqty qatynasta úlken mańyzǵa ıe. Osy rette búgin qabyldanǵan zań da erekshe ról atqarady. Bul qujat arqyly Ázerbaıjanda júrgen azamattarymyzdyń múddelerin tıisti deńgeıde qorǵaýǵa qosymsha múmkindikter týyndaıdy. Aldaǵy ýaqytta bul zań kóshi-qon salasyn rettep, ek el arasyndaǵy yntymaqtastyqty odan ári damytýǵa oń septigin tıgizedi dep senemiz», - dedi M. Áshimbaev.