Senat Azamattyq protsestik kodeks jobasyn úshinshi oqylymda Májiliske qaıtardy

Jańa redaktsııadaǵy kodeks Qazaqstannyń quqyqtyq saıasat tujyrymdamasyn iske asyrý maqsatynda jáne Memleket basshysynyń sýdıalardyń VI sezinde qoıǵan mindetterin oryndaý úshin ázirlengen bolatyn. Tutastaı alǵanda Azamattyq protsestik kodeks jobasy azamattyq-protsestik zańnamanyń jedeldigin arttyrýdy, sot isin júrgizýde bitimdestirý rásimderin belsendi qoldaný úshin ony jańǵyrtý arqyly jeke jáne zańdy tulǵalardyń konstıtýtsııalyq quqyqtary men bostandyqtaryn sotta tıimdi qorǵaýdy qamtamasyz etýdi kózdeıdi. Sonymen qatar, qujattyń erejeleri azamattardyń, memlekettiń jáne zańdy tulǵalardyń buzylǵan nemese daýlanyp otyrǵan quqyqtaryn, bostandyqtaryn jáne zańdy múddelerin qorǵaýdy qarastyrady. Ondaı múddelerdi qalpyna keltirý týraly azamattyq sot isin júrgizý talaptaryn oryndaýǵa, zańdylyqty saqtaýǵa, qoǵamnyń zań men sotqa kadir-qurmetpen qaraýdy qalyptastyrýǵa baǵyttalady. Talqylaý barysynda senatorlar kodekske seksennen astam túzetý engizgen. Bulardyń basym bóligi Memleket basshysynyń «100 naqty qadam» Ult josparyn júzege asyrýǵa baılanysty bolyp tabylady. Atap aıtqanda, Senat kodeks jobasyna Ult josparynyń 16-shy qadamyndaǵy úsh deńgeıli júıe qurý jaǵdaıynda azamattyq isterdi qaraýdyń protsestik tártibine kóshý, sonymen birge, 20-y qadamdaǵy barlyq sot protsesterin aýdıo, beıne taspaǵa mindetti túrde jazýdy engizýge baılanysty tolyqtyrýlar engizdi. Sonymen qatar, senatorlar talap qoıý somasyn eki myń aılyq eseptik kórsetkishten kem bolǵan jaǵdaıda jeke tulǵalardyń, al otyz myń aılyq eseptik kórsetkishten kem bolǵanda zańdy tulǵalardyń múliktik múddelerine baılanysty ister boıynsha sot aktilerin kassatsııalyq tártippen qaıta qaraýǵa shekteýler belgilep otyr. Endi qujat Májiliste talqylanatyn bolady.