Senat áıelderdiń zeınetkerlik jasyn ulǵaıtatyn qujatty birinshi oqylymda maquldady
ASTANA. 16 mamyr. QazAqparat - Búgin Qazaqstan Respýblıkasy Parlamenti Senatynyń jalpy otyrysynda «Qazaqstan Respýblıkasynda zeınetaqymen qamsyzdandyrý týraly» zań jobasy birinshi oqylymda maquldandy.
Endi zań jobasy ekinshi oqylymǵa ázirleý úshin bas komıtetke tapsyrylady.
Eske sala keteıik, zań jobasy negizinen Qazaqstandaǵy zeınetaqy júıesin jańǵyrtýdy kózdeıdi. Bul rette qujat boıynsha Biryńǵaı jınaqtaýshy zeınetaqy qoryn qurý qarastyrylady. Biryńǵaı jınaqtaýshy zeınetaqy qorynyń quryltaıshysy men aktsıoneri el Úkimeti bolsa, onyń zeınetaqy aktıvterin basqarýdy QR Ulttyq banki júzege asyrady. Budan bólek, zań jobasynyń sheńberinde aýyr jáne qaýipti óndiris jaǵdaıynda jumys isteıtin adamdar úshin mindetti sanatqa eńbekaqy tóleý qorynan 5 paıyz mólsherinde erikti kásiptik zeınetaqy jarnalaryn aýdarý qarastyrylady. Bul rette jumys berýshige júkteme kóbeımeıdi.
Zań jobasynda qamtylǵan basty jańalyqtardyń biri - áıelderdiń zeınetkerlik jasyn birizdendirý máselesi. Bul rette zań jobasynda qamtylǵandaı 2014 jyldyń 1 qańtarynan bastap zeınetkerlik jasty jyl saıyn 6 aıǵa ulǵaıta otyryp, birtindep 10 jyldyń ishinde júzege asyrý kózdeledi. Mundaı jaǵdaılarda zeınetkerlik jasty birdeılendirý áıelderdiń jınaqtaýshy zeınetaqy júıesine qatysý ótilin ulǵaıtý jáne zeınetaqy jınaqtarynyń kólemin arttyrý úshin usynylyp otyr. Bul tıisinshe, jınaqtaýshy zeınetaqy júıesinen alatyn zeınetaqynyń mólsherin arttyrýǵa septigin tıgizýi tıis.
Bunymen qosa, Senat negizgi zańǵa ilespe qujat «Qazaqstan Respýblıkasynyń keıbir zańnamalyq aktilerine zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» zań jobasyn da ekinshi oqylymda maquldady. Ondaǵy basty ózgerister negizinen Biryńǵaı jınaqtaýshy zeınetaqy qorynyń qurylýyna qatysty bolyp otyr.
Qyzý talqydan soń qujatqa daýys berý barysynda alty senator qalys qalyp, tórteýi qarsy shyqty.
