Senat aýmaqtyq qorǵanysqa qatysty zańdy maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń aýmaqtyq qorǵanysy týraly» Zańy maquldandy.
Atalǵan zańnyń negizgi maqsaty - qoǵamdyq qatynastardy quqyqtyq retteý jáne memlekettik saıasattyń zańdyq negizderin qamtamasyz etý.
- Zań aýmaqtyq qorǵanystyń tıimdi júıesin qalyptastyrýǵa, jumyldyrý daıyndyǵyn arttyrýǵa jáne tótenshe jaǵdaılarda halyqtyń qaýipsizdigin qamtamasyz etýge baǵyttalǵan. Negizgi zań aýmaqtyq qorǵanystyń maqsattary men mindetterin, prıntsıpteri men is-sharalaryn aıqyndaı otyryp, memlekettiń qorǵanys júıesinde bólek sala retinde qarastyrady. Osy baǵytqa jeke sala retinde zańda tıisti qarjylandyrý kólemi jáne aýmaqtyq áskerı organdar men bólimderdiń máselelerin retteıtin normalar kózdelgen. Zań jumyldyrý jáne áskerı jaǵdaı kezeńinde halyqty jáne obektilerdi qorǵaýǵa, aýmaqtyq qorǵanys kúshterin qurýǵa, jumys tártibin qamtamasyz etýge, jergilikti turǵyndardy qaýipsizdikti qamtamasyz etý is-sharalaryna tartýǵa baǵyttalǵan, - dedi senator Ǵalıasqar Sarybaev.
Zańǵa aýmaqtyq qorǵanysty tıimdi uıymdastyrý úshin qajet jańa termınder men anyqtamalar engizilgen. «Erikti» jáne «Ózin-ózi qorǵaýdy qalyptastyrý» sııaqty negizgi uǵymdar memleketimizdiń qorǵanys júıesine birinshi ret engizildi. Sondaı-aq, Qazaqstan Prezıdentiniń, Prezıdentke tikeleı baǵynatyn jáne esep beretin memlekettik organdardyń, Úkimettiń, Qorǵanys mınıstrliginiń, Qarýly Kúshteri Bas shtabynyń, ortalyq jáne jergilikti atqarýshy organdardyń ókilettikteri, zańdy jáne jeke tulǵalardyń quqyqtary men mindetteri bekitilgen.
- Munymen qosa, qorǵanys kúshteriniń quramy men jumys isteý tártibin retteıtin «Aýmaqtyq qorǵanys kúshteri» degen jeke taraý qarastyrylǵan, - dedi depýtat.
Aýmaqtyq qorǵanys kúshteri tómendegi aspektilerdi qamtıdy:
- Quqyq qorǵaý organdarynyń kúshteri men quraldary;
- Qarýly Kúshter, basqa da áskerı bólimder men qurylymdar bólgen kúshter men quraldar;
- Aýmaqtyq áskerler;
- Arnaıy qurylymdar;
- Ózin-ózi qorǵaý kúshteri.
- Aýmaqtyq áskerler men ózin-ózi qorǵaý qurylymdarynyń negizgi fýnktsııalary zańnyń jekelegen baptarynda bekitilgen. Jalpy, zańǵa qatysty aýmaqtyq qorǵanys kúshteriniń jumys isteý tártibi Qazaqstan Respýblıkasynyń aýmaqtyq qorǵanysyn daıyndaý jáne iske asyrý qaǵıdalarynda retteledi. Zańda Qazaqstan Respýblıkasy Qorǵanys josparynyń quramdas bóligi bolatyn aýmaqtyq qorǵanys josparyn ázirleý jáne bekitý tetigi naqty belgilengen. Aýmaqtyq qorǵanys salasyndaǵy zańnama talaptarynyń oryndalýyn qadaǵalaý osy saladaǵy ýákiletti organ retinde Qorǵanys mınıstrligine memlekettik baqylaý fýnktsııalary júktelgen. Negizgi zańnyń erejelerin iske asyrý úshin Qazaqstan Respýblıkasynyń 2 kodeksine jáne 14 zańyna ózgerister men tolyqtyrýlar engizildi. Bul ózgerister quqyqtyq olqylyqtar boldyrmaýǵa, Qorǵanys mınıstrliginiń basqa memlekettik organdarmen jáne kólik kásiporyndarymen áskerı tasymaldaýdy uıymdastyrý, jol qatynastaryn tehnıkalyq jabý máselelerin retteýge baǵyttalǵan ózara is-qımylyn qarastyrady, - dep túsindirdi senator.
Ǵalıasqar Sarybaevtyń paıymynsha, zańnyń qabyldanýy birneshe oń áleýmettik áser beredi:
1. Aýmaqtyq qorǵanys salasynda ortalyq jáne jergilikti atqarýshy organdar qyzmetiniń tıimdiligi artady;
2. Eriktilerdiń turaqty áskerı qurylymdarymen ózara is-qımyl jasaý tártibi belgilenip, azamattarymyz elimizdi qorǵaýǵa qajet bilim men tájirıbe jınaqtaýǵa umtylady, patrıottyq sana qalyptasady.
Eske salsaq, bıyl sáýir aıynda Parlament Májilisi aýmaqtyq qorǵanys týraly zańdy qabyldaǵanyn jazǵan edik.