Senat asyl tuqymdy mal sharýashylyǵy máselesin qamtyǵan jobany maquldady
ASTANA. 14 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine asyl tuqymdy mal sharýashylyǵy máseleleri boıynsha ózgerister men tolyqtyrýlar engizý týraly»
zań jobasyn birinshi oqylymda maquldady.
Zań jobasy aýyl sharýashylyǵyn nyǵaıtý jónindegi sharalar qoldaný kezeńinde el ekonomıkasynda aıryqsha mańyzǵa ıe bolmaǵan mal sharýashylyǵy salalaryn qalpyna keltirýge baılanysty zańnamany jetildirýge baǵyttalǵan. «Atap aıtqanda, ósimdik sharýashylyǵy men mal sharýashylyǵynyń negizgi salalary damyǵannan keıin elde balyq sharýashylyǵy men bal arasy sharýashylyǵyn qalpyna keltirýge baılanysty qosymsha sharalar damytyla bastady. Osy rette bolyp jatqan ózgerister qoldanystaǵy zańnamanyń jekelegen noromalaryn qoldanýdyń jáne oryn alǵan olqylyqtardy joıýdyń qalyptasqan tájirıbesine sáıkes, tıisti normalarǵa túzetýler engiziledi», - dedi zań jobasy boıynsha baıandaǵan Aýyl sharýashylyǵy mınıstri Asyljan Mamytbekov.
Osyǵan oraı, zań jobasynda jeke kásipkerlik sýbektilerine ákimshilik júktemeni azaıtý maqsatynda júrgizilip otyrǵan memlekettik saıasatqa sáıkes memlekettik organdardyń baqylaý jáne qadaǵalaý fýnktsııalaryn retteýler kózdeledi. Budan bólek, asyl tuqymdy mal sharýashylyǵy salasyndaǵy sýbektilerdi attestattaý men qaıta attestattaýdy reglamentteý qaıta qarastyrylady. Selektsııalyq asyldandyrý jumysyn júrgizý máselelerinde maqsattar men mindetterdiń arajigi ajyratylady.
Birinshi oqylymda maquldanǵan zań jobasy, ekinshi oqylymǵa ázirleý úshin bas komıtetke tapsyryldy.
