Senat Astana men respýblıkalyq mańyzdaǵy qalalardy damytý týraly zańdy maquldady
ASTANA. KAZINFORM – Senat Astana men respýblıkalyq mańyzdaǵy qalalardy damytý týraly zańdy eki oqylymda maquldady.
Qujatty tanystyrǵan senator Álibek Náýtıev bul zań 11 kodeks pen 47 zańǵa túzetýler engizetinin aıtty.
Zańda mynadaı negizgi túzetýler kózdelgen:
- Respýblıkalyq mańyzy bar qalanyń, astananyń dızaın-kodyn jáne ony ákimshilendirý qaǵıdalaryn engizý;
- ǵımarattyń/turǵyn úıdiń menshik ıesine zańǵa qaıshy ornalastyrylǵan jarnama obektisin bólshekteý talaptaryn qoldaný;
- eldi mekenderdiń avtomobıl joldary men kósheleriniń júris bóligine, jaıaý júrginshiler men velosıped joldarynyń trotýarlaryna, qoný alańdaryna, aıaldama pýnktterine (kórneki) jarnamany ornalastyrýǵa tyıym salý;
- aýdıo jarnamalardy ashyq keńistikte taratýǵa tyıym salý.
Sondaı-aq, Astanadaǵy «jasyl beldeýdiń» quqyqtyq mártebesin aıqyndaý usynylyp otyr.
- Máselen, Zańda qalanyń sanıtarlyq-qorǵaý jasyl aımaǵyn basqarý qaǵıdalaryn jáne onyń aýmaǵyndaǵy qyzmettiń shekteýli rejımin bekitý kózdelgen. Ol úshin júz paıyz memleket menshiginde bolatyn zańdy tulǵany anyqtaý kerek bolady, - dedi senator.
Qujatta zańsyz menshiktegi jer ýchaskelerin qaıta resimdeý tártibin engizý tetikteri de qarastyrylǵan. Mundaı jaǵdaıda jer ıesine telimdi ózi satyp alǵan kezdegi qunyn ǵana ótep, memleket alyp qoıǵan jerdi ótkizýden túsken tabysty bıýdjetke baǵyttaý kerek.
Sonymen birge respýblıkalyq mańyzy bar qala, astana ákimdiginiń qalanyń turǵyn úı sektorynda shlagbaýmdar men basqa da qorshaýlar ornatý qaǵıdalaryn bekitý jónindegi quzyreti keńeıtiledi.
- Zańda elorda ákimdiginiń turǵylyqty jeri jáne onyń aýmaǵynda ýaqytsha bolatyn (turatyn) jeri boıynsha tirkeý normatıvterin ázirleý jónindegi ókilettikterin keńeıtý jóninde túzetýler usynylady. Jol júrisin uıymdastyrýdy retke keltirý maqsatynda Astana jáne Almaty qalalarynda ákimdikterge jol júrisin uıymdastyrý ortalyǵyn qurý jáne jol júrisin uıymdastyrý men retteý qaǵıdalaryn bekitý jónindegi quzyretti berý kózdeledi. Ol evakýatsııalaý máselelerin, arnaıy turaqtar, alańdar (aıyppul turaqtary) máselelerin qamtıdy, - dedi Álibek Náýtıev.
Qujatta energetıkalyq jáne kommýnaldyq sektorlardy jańǵyrtý jobalaryna tartylǵan qaryzdar mólsherlemesiniń bir bóligin sýbsıdııalaý tetigi aıqyndalǵan.
- «Tolyq bitirip beriletin» qurylys jobalary boıynsha qabyldanatyn memlekettik mindettemelerdiń kólemi memlekettik mindettemeler lımıtterimen shekteletin bolady. Zańda Energetıkalyq jáne kommýnaldyq sektorlardy jańǵyrtý ulttyq jobany satyp alýdyń jekelegen elektrondyq platformasyn engizý kózdelgen. Onyń asynda jumystar men kórsetiletin qyzmetterdi satyp alý, jobalar men jetkizýshilerdi irikteý, sharttar jasasý, qazaqstandyq taýar óndirýshilerden taýarlar satyp alý jáne ofteık-kelisimsharttar jasasý júzege asyrylady, - dedi depýtat.
Sondaı-aq, bul zań Úkimettiń 9 fýnktsııasyn ortalyq memlekettik organdarǵa, ortalyq memlekettik organdardan 37 fýnktsııasyn jergilikti atqarýshy organdar men máslıhattarǵa, oblystyq ákimdikterdiń 17 fýnktsııasyn aýdan ákimdikterine beredi.
Eske salsaq, ótken aıda Astana men Almatyda jedel járdem qyzmetkerleri vıdeojeton paıdalana bastady.