Senat áskerı polıtsııa organdarynyń qyzmetin jetildirýge qatysty qujatty maquldady
ASTANA. QazAqparat – Senattyń jalpy otyrysynda «Áskerı polıtsııa organdary týraly» Zań maquldandy, dep habarlaıdy QazAqparat tilshisi.
Zań áskerı polıtsııa organdarynyń qyzmetin jetildirý maqsatynda ázirlendi. Áskerı polıtsııa organdarynyń mindetterin, quzyretin, qurylymyn, ókilettikterin aıqyndaý, sondaı-aq júzege asyrylyp jatqan fýnktsııalaryn zańnamalyq turǵydan bekitý bóliginde ózgerister kózdelgen. Áskerı polıtsııa organdarynyń kúshtik vedomstvolarǵa baǵyný tártibi, sondaı-aq olardyń ózara jáne basqa da memlekettik organdarmen is-qımyl jasaý tártibi rettelgen.
«Áskerı polıtsııa organdaryna Qarýly Kúshterde, basqa da áskerler men áskerı quralymdarda quqyqtyq tártipti qamtamasyz etý, áskerı qyzmetshilerdi qamaqqa alý, ákimshilik qamaqqa alý túrindegi jazany, sondaı-aq qoǵamnan ýaqytsha oqshaýlaýdyń ózge de sharalaryn oryndaý boıynsha mindetter júkteledi. Zańda áskerı polıtsııa organdary áskerı qyzmetshileriniń kúshin, arnaýly quraldardy, qarýdy qoldaný máseleleri, sondaı-aq olardyń kadrlyq quramy jáne áleýmettik qamsyzdandyrylý máseleleri retteledi», - delingen Senattyń Halyqaralyq qatynastar, qorǵanys jáne qaýipsizdik komıteti málimetinde.
Bul qujatty talqylaý barysynda Májilis qabyldaǵan Zańǵa mynadaı negizgi baǵyttar boıynsha ózgerister engizildi:
- Zańnyń 1-babynyń taqyrybynyń ataýy atalǵan baptyń mazmunyna sáıkes keltiriledi;
- áskerı polıtsııa organdarynyń mindetteri, onyń ishinde Ulttyq qaýipsizdik komıteti áskerı polıtsııa organdarynyń mindetteri naqtylanady;
- áskerı polıtsııa organdary áskerı qyzmetshileriniń qarý qoldanýy jónindegi normanyń redaktsııasy naqtylanady.
