Senat Armenııanyń Úkimet basshysyna baılanysty qujatty qabyldady

ASTANA. QazAqparat - Parlament Senatynyń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgeris engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat.

«2015 jylǵy 6 jeltoqsanda Armenııada konstıtýtsııalyq referendým ótip, nátıjesinde prezıdenttik basqarý túri parlamenttik basqarýǵa ózgergeni belgili. Qabyldanǵan ózgeristerge sáıkes, 2018 jyly sáýir aıynan bastap Armenııanyń Premer-Mınıstri eldiń joǵary laýazymdy tulǵasy boldy», - dep eske saldy QR Syrtqy ister mınıstri Beıbit Atamqulov.

Atap aıtqanda, Armenııa Premer-Mınıstri ókilettikterine syrtqy saıasat máseleleri de jatady, sonymen qatar ol memlekettiń qaýipsizdik keńesin basqarady. Qarýly kúshter Úkimetke baǵynady. Armenııa Prezıdentinde qazir shektelgen ókildik qyzmetteri bar. Bul elde aıaqtalǵan saıası reformany eskere otyryp, Joǵary Eýrazııalyq ekonomıkalyq keńestiń quramyna múshe memleketterdiń basshylarymen qatar, úkimet basshynyń kirýin retteý maqsatynda atalǵan hattamany Eýrazııalyq ekonomıkalyq komıssııa múshe memlekettermen birlesip ázirledi.

«Osy zań jobasyn qabyldaý teris áleýmettik-ekonomıkalyq, quqyqtyq saldarǵa ákep soqtyrmaıdy», - dedi mınıstr.