Senat Almatyda DDU keńsesin ashý týraly zań jobasyn qarady
ASTANA. QazAqparat - Parlament Senaty Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasynyń Úkimeti men Dúnıejúzilik densaýlyq saqtaý uıymy arasyndaǵy Qazaqstan Respýblıkasynyń Almaty qalasynda Dúnıejúzilik Densaýlyq Saqtaý uıymynyń medıtsınalyq-sanıtarııalyq alǵashqy kómek jónindegi geografııalyq jaǵynan qashyq ornalasqan ofısin ashý týraly kelisimdi ratıfıkatsııalaý týraly» zań jobasy qaraldy.
Ofıstiń negizgi mindetteri medıtsınalyq-sanıtarııalyq alǵashqy kómekti damytý salasynda densaýlyq saqtaý qyzmetterin kórsetý jónindegi jumystardy kúsheıtý, Dúnıejúzilik densaýlyq saqtaý uıymynyń Eýropalyq óńirlik bıýrosynyń densaýlyq saqtaý qyzmetterin ádil, qaıyrymdy, nátıjeli jáne tıimdi usynýǵa qatysty óńirlik jáne jahandyq deńgeıde qabyldanǵan mindetterin oryndaý jónindegi qyzmetine járdemdesý jáne qoldaý kórsetý bolyp tabylady.
Sondaı-aq, zań jobasynda joǵary sapaly fýnktsıonaldyq jáne ınnovatsııalyq bilim berý, medıtsınalyq qyzmet kórsetýde úılestirýdi, ıntegratsııalaýdy jáne úzilissizdikti qamtamasyz etý, pallıatıvtik kómekti qosa alǵanda, sozylmaly jaı-kúılerin eskere otyryp, ómirdiń ártúrli kezeńderinde patsıentterdi jáne aýrý jaǵdaılaryn qadaǵalap otyrý, sonymen birge múshe memleketter densaýlyq saqtaý qyzmetterimen jappaı qamtýdy ulǵaıtý jóninde kúsh salýda ushyrasatyn basqa ózekti máseleler boıynsha normalar bekitilgen.
Zań jobasy Palatanyń qaraýyna jiberildi.
