Senat Almatyda Halyqaralyq valıýta qorynyń óńirlik ortalyǵyn qurý týraly zańdy maquldady

Senator Serik Óteshov bul memorandýmdy ratıfıkatsııalaýdyń qandaı mańyzy bar ekenin aıtty.

– Qujat Almaty qalasynda Kavkaz, Ortalyq Azııa jáne Mońǵolııa úshin Halyqaralyq Valıýta Qorynyń óńirlik ortalyǵynyń tolyqqandy jumys isteýi úshin qajetti quqyqtyq negiz qalyptastyrady. Ortalyqtyń bizdiń elimizde ornalasýy Qazaqstannyń aımaqtaǵy qarjylyq bilim men quzyretterdiń negizgi haby retindegi rólin nyǵaıtyp, memleketimizdiń halyqaralyq bedelin arttyrady, - dedi ol.

Ortalyq Almaty qalasynda ornalasqan.

– Bul bizdiń mamandarǵa Vashıngton nemese Vena qalalaryna barmaı-aq, eń úzdik halyqaralyq praktıkalyq bilimge tikeleı qol jetkizýge múmkindik beredi. Ortalyq jumys istegen ýaqyt ishinde 4 myńnan astam maman oqýdan ótti, onyń ishinde Qazaqstannan 1 370-ten astam qyzmetker bar. Ortalyqtyń Almatyda ornalasýynyń ekonomıkalyq tıimdiligi de joǵary. Alǵashqy bes jylda ortalyqty qarjylandyrýǵa baǵyttalǵan 48 mıllıon dollardyń basym bóligi Almaty qalasynyń ekonomıkasynda qalady. Bul jergilikti bıznesti qoldaýǵa jáne qyzmet kórsetý salasyn damytýǵa oń yqpal etedi. Memorandýmda qarastyrylǵan ımmýnıtetter men artyqshylyqtar halyqaralyq uıymdar úshin standartty bolyp esepteledi jáne olardyń táýelsiz qyzmetin qamtamasyz etýge baǵyttalǵan, - dedi depýtat.

Atalǵan óńirlik ortalyq Qazaqstan, Armenııa, Ázerbaıjan, Grýzııa, Qyrǵyzstan, Mońǵolııa, Tájikstan, Túrikmenstan, Ózbekstan sııaqty 9 elge Halyqaralyq valıýta qorynyń qyzmetin kórsetedi.

Senattyń Qarjy jáne bıýdjet komıtetiniń múshesi Núrııa Nııazova Almaty qalasy Ortalyq Azııa memleketteriniń arasyndaǵy konkýrs nátıjesinde tańdap alynǵanyn aıtty.

– Memorandým Óńirlik ortalyqqa jáne onyń qyzmetkerlerine ımmýnıtetter men artyqshylyqtar berýdi kózdeıdi, - dedi senator.

Buǵan deıin Halyqaralyq valıýta qorynyń Azııa-Tynyq muhıty elderine qyzmet etetin óńirlik ortalyǵy Shanhaıda ashylǵanyn jazǵan edik.