Senat ákimshilik ádilet ınstıtýtyn jetildirýge múmkindik beretin Zańdy maquldady
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine ákimshilik ádilet, norma shyǵarý jáne zań kómegin uıymdastyrý máseleleri boıynsha ózgerister men tolyqtyrýlar engizý týraly» Zań 2 oqylymda qaralyp, maquldandy.
— Konstıtýtsııalyq zańnama, sot júıesi jáne quqyq qorǵaý organdary komıteti «Qazaqstan Respýblıkasynyń keıbir zańnamalyq aktilerine ákimshilik ádilet, norma shyǵarý jáne zań kómegin uıymdastyrý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyn ekinshi oqylymda keńeıtilgen otyrysta qarap, zańnyń mynadaı mańyzdy erejelerin atap ótedi. Birinshiden, zań Azamattyq protsesstik kodeksinen jarııa-quqyqtyq daýlardyń jekelegen sanattaryn alyp tastap, olardy Ákimshilik rásimdik-protsestik kodeksine aýystyra otyryp, ákimshilik ádilet aıasyn keńeıtedi, — dedi qujat boıynsha negizgi baıandama jasaǵan senator Murat Qadyrbek.
Onyń aıtýynsha, atalǵan aýystyrý Qazaqstan Respýblıkasy Konstıtýtsııalyq soty qyzmetiniń erekshelikterin, sondaı-aq konstıtýtsııalyq sot isin júrgizý men zańǵa táýeldi normatıvtik quqyqtyq aktiniń zańdylyǵyna daý aıtý týraly ister boıynsha is júrgizýdiń naqty ara jigin ajyratý qajettigin eskere otyryp júzege asyrylady. Tıisti túzetýler qabyldanǵan jaǵdaıda, ózine qatysty qoldanylatyn zańǵa táýeldi normatıvtik quqyqtyq akt qabyldanǵan kezde (ne onyń jekelegen erejelerimen) quqyqtary men zańdy múddeleri buzyldy dep esepteıtin kez kelgen azamat nemese zańdy tulǵa mundaı aktini daýlap, ákimshilik sotqa talap aryzben júginýge quqyly.
— Ekinshiden, mehanıkalyq kólik quraldary men olardyń tirkemelerine mindetti tehnıkalyq baıqaýdyń biryńǵaı aqparattyq júıesi operatorynyń tehnıkalyq baıqaý operatorynyń quziretterine qatysty ókilettikteri boıynsha «Jol júrisi týraly» Zańǵa túzetýler engiziledi, — dedi ol.
Senatordyń atap ótýinshe, úshinshiden, zańda ákimshilik rásimderdiń tártibin odan ári jetildirýge baǵyttalǵan birqatar ózgerister men tolyqtyrýlar kózdelgen. Olardyń qatarynda daýlardy sotqa deıingi tártippen qaraý; ótinishterdi qabyldaý, tirkeý jáne qaıtarý rásimderi; ákimshilik rásimniń merzimderin naqtylaý jáne olardy esepteý tártibi máseleleri bar.
— Tórtinshiden, «Notarıat týraly», «Sot-saraptama qyzmeti týraly», «Advokattyq qyzmet jáne zań kómegi týraly», «Atqarýshylyq is júrgizý jáne sot oryndaýshylarynyń mártebesi týraly» salalyq zańdar qyzmettiń tıisti túrlerimen aınalysý quqyǵyna úmitker adamdarǵa attestattaýdy júrgizý tártibi bóliginde bir retke keltirildi. Bul rette, attestattaýdy júrgizýdiń tártibi men sharttarynyń anaǵurlym tolyq reglamentin ýákiletti organ sanalatyn Ádilet mınıstrligi aıqyndaıtyn bolady. Zańnyń qabyldanýy sot sheshimderiniń sapasy men memlekettik organdar jumysyn jaqsartýǵa oń yqpal etip, ákimshilik ádilet ınstıtýtyn jetildirýge múmkindik beredi, — dedi Murat Qadyrbek.
Buǵan deıin «Jer qoınaýy jáne jer qoınaýyn paıdalaný týraly» Kodekske kómirsýtekter men ýran salasynda jer qoınaýyn paıdalanýdy jetildirý máseleleri boıynsha ózgerister men tolyqtyrýlar engizý týraly» Zań eki oqylymda qaralyp, maquldanǵan edi.