Senat ákimshilik quqyqbuzýshylyqqa qatysty zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń Ákimshilik quqyqbuzýshylyq týraly kodekske ózgerister men tolyqtyrýlar engizý týraly» zań jobasyn talqylady. Qujatqa ózgerister engizilgendikten, zań jobasy Májiliske qaıtaryldy, dep habarlaıdy QazAqparat.
Zań jobasynyń maqsaty Qazaqstan Respýblıkasynyń Ákimshilik quqyqbuzýshylyq týraly zańnamasyn odan ári jetildirýge, ákimshilik-delıktilik zańnamasyn izgilendirýge, jekelegen protsestik normalardy júıeleýge, sondaı-aq quqyqtyq olqylyqtar men kollızııalardy joıýǵa negizdelgen.
Talqylaý barysynda Májilis maquldaǵan zań jobasyna Senat depýtattary ózgerister men tolyqtyrýlar engizdi.
Osy oraıda ákimshilik quqyqbuzýshylyqtar týraly isterdi qaraý boıynsha sot pen ýákiletti organ arasyndaǵy quzyretterdiń arajigin ajyratý, kodekstiń qurylymdyq elementterindegi siltemelerdi sáıkes keltirý, zań jobasynyń ishki qaıshylyqtaryn joıý eskerilgen.
Sonymen qatar zań jobasyn «QR keıbir zańnamalyq aktilerine olardy QR Konstıtýtsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» 2017 jylǵy 11 shildedegi Zańynyń normalarymen sáıkes keltirý máselesi qarastyrylǵan. Atalǵan talap QR Joǵarǵy Soty tóraǵasynyń ókilettikterin keńeıtýdi kózdeıdi.
«Barlyq eskertýler men usynystar 33 túzetýlerden turatyn salystyrma kestege engizilip, barlyq túzetýler qabyldandy», - dedi depýtat Dýlat Qusdáýletov.
