Senat Ákimshilik quqyq buzýshylyq týraly kodeksti birinshi oqylymda maquldady
ASTANA. QazAqparat - Búgin Parlament Senatynyń jalpy otyrysynda Ákimshilik quqyq buzýshylyq týraly kodeks jobasy birinshi oqylymda maquldandy. Kodeks jobasy ákimshilik zańnamany eleýli túrde reformalaýǵa baǵyttalady.
Bul rette ákimshilik zańnamany izgilendirý, sottarǵa júktemeni azaıtý sharalary qarastyrylady. Osyǵan balanysty sottardyń jáne ákimshilik quqyq buzýshylyq týraly isterdi qaraýǵa ýákilettilik berilgen organdardyń quzyreti qaıta qaralady. Kodeks jobasyna sáıkes, aıyppuldyń absolıýttik belgili bir mólsheri kózdeledi. Bul ákimshilik jaza shyǵarý kezinde sybaılas jemqorlyq faktilerin joıýǵa múmkindik beredi.
«Jańa redaktsııa boıynsha ákimshilik qamaýǵa alýdyń eń uzaq merzimi otyz táýlikke, aıryqsha jaǵdaılardaǵy tótenshe jaǵdaılar rejıminde qyryq bes táýlikke deıin qysqartylyp otyr. Ákimshilik quqyq buzýshylyq jasaǵan maskúnemdikpen, nashaqorlyqpen nemese ýytqumarlyqpen aýyratyndarǵa medıtsınalyq sıpattaǵy májbúrleý sharalaryn qoldaný sekildi jazalaý normalary alynyp tastaldy», - deıdi ádilet mınıstri Berik Imashev. Onyń aıtýynsha, kodeks jobasynda sybaılas jemqorlyq faktoryn alyp tastaý maqsatynda, sonymen qatar qysqartylǵan is júrgizýdi qamtamasyz etý úshin absolıýtti túrde anyqtalǵan aıyppuldar kólemi belgilengen. Bul óndirip alýdyń basqa túrleri boıynsha salystyrmaly túrdegi belgili bir sanktsııalardy, onyń ishinde qyzmetti, lıtsenzııany toqtata turý, lıtsenzııadan jáne quqyqtan aıyrý sanktsııalary saqtalady.
Budan bólek, joba redaktsııasynda ákimshilik quqyqbuzýshylyq týraly isterdi qaraýǵa ýákilettik bergen organdardyń quzyretterin qaıta qaraý qarastyrylǵan. Atap aıtqanda, sottyń vedomstvolyq baǵynystylyǵynan sanktsııalarynda aıyppul túrindegi ákimshilik jaza qarastyrylatyn baptardyń birqataryn memlekettik organdarǵa aýystyrý qamtylyp otyr. Kodeks jobasy ekinshi oqylymǵa ázirleý úshin bas komıtetke joldanady.
