Senat Ákimshilik quqyq buzýshylyq kodeks jobasyn Májiliske qaıtardy
ASTANA. QazAqparat - Parlament Senaty Ákimshilik quqyq buzýshylyq týraly kodeks jobasyn Májiliske qaıtardy. Búgin palatanyń jalpy otyrysynda qujatty ekinshi oqylymda talqylap, birqatar túzetýler engizgen senatorlar osyndaı sheshim qabyldady.
Jalpy alǵanda, kodeks jobasy ákimshilik zańnamany eleýli túrde reformalaýǵa baǵyttalady. Bul rette ákimshilik zańnamany izgilendirý, sottarǵa júktemeni azaıtý sharalary qamtylady. Osyǵan balanysty sottardyń jáne ákimshilik quqyq buzýshylyq týraly isterdi qaraýǵa ýákilettilik berilgen organdardyń quzyreti qaıta qaralady. Kodeks jobasyna sáıkes, aıyppuldyń absolıýttik belgili bir mólsheri kózdeledi. Bul ákimshilik jaza shyǵarý kezinde sybaılas jemqorlyq faktilerin joıýǵa múmkindik beredi.
Budan bólek, jańa redaktsııa boıynsha ákimshilik qamaýǵa alýdyń eń uzaq merzimi 30 táýlikke, aıryqsha jaǵdaılardaǵy tótenshe jaǵdaılar rejıminde 45 táýlikke deıin qysqartylyp otyr. Ákimshilik quqyq buzýshylyq jasaǵan maskúnemdikpen, nashaqorlyqpen nemese ýytqumarlyqpen aýyratyndarǵa medıtsınalyq sıpattaǵy májbúrleý sharalaryn qoldaný sekildi jazalaý normalary alynyp tastalǵan. Budan bólek, kodeks jobasynda sybaılas jemqorlyq faktoryn alyp tastaý maqsatynda, sonymen qatar qysqartylǵan is júrgizýdi qamtamasyz etý úshin absolıýtti túrde anyqtalǵan aıyppuldar kólemi belgilengen.
Sonymen qatar joba redaktsııasynda ákimshilik quqyqbuzýshylyq týraly isterdi qaraýǵa ýákilettik bergen organdardyń quzyretterin qaıta qaraý qamtylady. Atap aıtqanda, sottyń vedomstvolyq baǵynystylyǵynan sanktsııalarynda aıyppul túrindegi ákimshilik jaza qarastyrylatyn baptardyń birqataryn memlekettik organdarǵa aýystyrý kózdelip otyr.
Qujatty talqylaý barysynda senatorlar birqatar ózgerister men tolyqtyrýlar engizýdi jón dep sanaǵan. Atap aıtqanda, joǵary palata depýtattary zań buzýshylyqtarǵa yqpal etetin jaǵdaılardy joıý maqsatynda sýdıa men laýazymdy tulǵanyń jekeshe qaýly ne usynym shyǵarý quqyǵyn kózdeıtin tolyqtyrýlar engizdi. Sondaı-aq bógetterdiń qaýipsizdigi salasyndaǵy attestattalatyn jumys túrlerin júrgizý kezinde zańnamany buzǵany úshin ákimshilik jaýapkershilikti sý qoryn paıdalaný jáne qorǵaý salasyndaǵy ýákiletti organnyń quzyretine jatqyzý kózdeledi, óıtkeni jobada atalǵan quzyret belgilenbegen. Buǵan qosa, senatorlar birqatar redaktsııalyq naqtylaý sıpatyndaǵy ózgertýlerdi engizip otyr.
