Senat agroónerkásip kesheni máseleleri boıynsha tyńdaý ótkizedi
ASTANA. QazAqparat - Bıylǵy sáýir aıynda Senatta «Eýrazııalyq ekonomıkalyq odaq jáne Dúnıejúzilik saýda uıymy jaǵdaıynda otandyq agrarlyq sektordyń básekege qabilettiligin arttyrý - zańnamalyq retteý jáne ony tájirıbelik turǵydan iske asyrý» taqyrybynda parlamenttik tyńdaý ótetin boldy. Bul týraly sheshim 15 aqpanda bolǵan Senat bıýrosynda qabyldandy.
Palata Tóraǵasy Qasym-Jomart Toqaev atap ótkendeı, parlamenttik tyńdaýlar qabyldanǵan zańdardyń iske asyrylý barysy týraly jan-jaqty jáne tolyq aqparat alyp, túıindi máselelerdi tereń zerdeleýge múmkindik beredi. «Ótken jyly Ult jospary sheńberinde aýyl sharýashylyǵyn jandandyrýǵa baǵyttalǵan birqatar zańdar qabyldandy. Ol zańdardyń oryndalý barysy árdaıym depýtattardyń nazarynda bolýy qajet. Sonymen qatar, elimizdiń Eýrazııalyq ekonomıkalyq odaqtaǵy jáne Dúnıejúzilik saýda uıymyndaǵy músheligi jaǵdaıynda agroónerkásiptik keshenniń básekege qabilettiligin qamtamasyz etý ózekti máselelerdiń biri bolyp tabylady», - dedi Q.Toqaev. Parlamenttik tyńdaýdy ótkizýdi uıymdastyrý Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine júkteldi.
Senat Bıýrosy joǵarǵy Palatanyń 2016 jylǵy 18 aqpanda bolatyn kezekti otyrysynyń kún tártibin kelisti.
Senatorlar Qazaqstan Úkimeti men Halyqaralyq kórmeler bıýrosy arasyndaǵy Astana qalasynda EKSPO-2017 halyqaralyq mamandandyrylǵan kórmesin ótkizýge baılanysty resmı qatysýshylarǵa arnalǵan jeńildikter men preferentsııalar týraly kelisimdi; «Tabıǵı teriden jasalǵan kıim zattary, kıimge kerek-jaraqtar jáne ózge de buıymdar» taýar pozıtsııasy boıynsha taýarlardy baqylaý (ıdentıfıkatsııalaý) belgilerimen tańbalaýdy engizý jónindegi pılottyq jobany 2015 - 2016 jyldary iske asyrý týraly kelisimdi; Qazaqstan men Moldova arasyndaǵy zańsyz bolatyn adamdardyń readmıssııasy týraly úkimetaralyq kelisimdi jáne osy kelisimdi iske asyrý boıynsha atqarý hattamasyn; Qazaqstan men Reseı arasyndaǵy Sary-Shaǵan synaq polıgonyn paıdalaný men jalǵa berý sharttary jáne Prıozersk qalasynyń tirshilik áreketin qamtamasyz etý týraly kelisimge ózgerister men tolyqtyrýlar engizý týraly hattamany; Qazaqstan men Reseı arasyndaǵy Saryshaǵan synaq polıgonyn jaldaý týraly shartqa ózgerister engizý týraly úkimetaralyq hattamany; Qazaqstan men Qyrǵyzstan arasyndaǵy óteýsiz áskerı-tehnıkalyq kómek kórsetý týraly úkimetaralyq kelisimdi ratıfıkatsııalaý týraly zańdar jobalaryn talqylaıdy.
Bıýroda sondaı-aq Úkimetten kelgen zań jobalary Senattyń turaqty komıtetterine bólindi.
Konstıtýtsııalyq zańnama, sot júıesi jáne quqyq qorǵaý organdary komıteti Adamdardyń readmıssııasy týraly Qazaqstan men Norvegııanyń úkimetaralyq kelisimin ratıfıkatsııalaý týraly zań jobasy boıynsha bas komıtet bolyp belgilendi.
Qarjy jáne bıýdjet komıtetine Qazaqstan Úkimeti men Halyqaralyq kórmeler bıýrosy arasyndaǵy Astana qalasynda EKSPO-2017 halyqaralyq mamandandyrylǵan kórmesin ótkizýge baılanysty resmı qatysýshylarǵa arnalǵan jeńildikter men preferentsııalar týraly kelisimdi ratıfıkatsııalaý týraly zań jobasyn júrgizý tapsyryldy.
