Senat: Agroónerkásip keshen máselelerine arnalǵan zań jobasy maquldandy
ASTANA. 19 jeltoqsan. QazAqparat - Búgin QR Parlamenti Senatynyń Tóraǵasy Qasym-Jomart Toqaevtyń jetekshiligimen ótken palata otyrysynda depýtattar «Qazaqstan Respýblıkasynyń keıbir zańnamalyq aktilerine agroónerkásip kesheni máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Eske sala keteıik, atalǵan qujatqa Májilistiń bir top depýtattary bastamashylyq jasaǵan bolatyn. Zań jobasymen 12 zańnamalyq aktige agroónerkásip kesheni men veterınarııa salasyn jetildirýge baǵyttalǵan ózgerister engizý kózdeledi. Sonymen qatar, qujatty ázirleýge Elbasynyń Joldaýyndaǵy tapsyrmalaryn oryndaý negiz bolǵan. Atap aıtqanda, Memleket basshysy «jeke ınvestıtsııalardyń agrarlyq óndiriske táýekeldiligin tómendetý úshin zaemdardy kepildendirý men saqtandyrýdyń memlekettik júıesin engizý» týraly tapsyrma júktegen bolatyn.
«Zań jobasymen ınvestıtsııalyq salymdar kezinde agroónerkásip keshen sýbektileri shyǵystarynyń bir bóligin óteý kózdeledi. Osy arqyly olar jańa óndiris qýatyn qurǵan kezde nemese qoldanystaǵysyn jańǵyrtý barysynda ózderiniń shyǵystaryn ishinara jaba alady. Memlekettik qoldaýdyń osy baǵyty agrarlyq sektorǵa ınvestıtsııany arttyrýǵa, agroónerkásip kesheniniń basym baǵyttaryn damytýǵa oń yqpal etedi», - deıdi Májilis depýtaty Roman Kım.
Onyń aıtýynsha, zań jobasymen qaıta óńdeýshi kásiporyndardyń aýyl sharýashylyǵy shıkizatyn satyp alýǵa arnalǵan shyǵyndaryn sýbsıdııalaý qarastyrylyp otyr. «Óńdeýshi ónerkásiptegi basty kedergilerdiń biri - shıkizatqa baǵanyń joǵary bolýy. Osynyń ózi túpki ónimniń baǵasyna, onyń naryqtaǵy básekelestigine áser etedi. Al bul normany engizsek, ónerkásip óndirgen ónimniń baǵasy da tómendep, básekege qabileti de artady. Túptep kelgende, mundaı tetik ishki naryqta tutynylatyn otandyq ónimniń úlesin arttyryp, azyq-túlik qaýipsizdigin nyǵaıta túspek», - dedi R. Kım.
Bul rette satyp alynatyn shıkizattyń keıbir túrlerin ǵana sýbsıdııalaý qarastyrylady. Atap aıtqanda, qant qyzylshasy men sútti satyp alýǵa basymdyq berilmek. Óıtkeni, mundaı shıkizat túrleri elimizdiń azyq-túlik qaýipsizdigin qamtamasyz etýde mańyzdy sanalyp otyr. Budan bólek, zań jobasymen veterınarlyq-sanıtarlyq qaǵıdalardy buzǵany úshin ákimshilik jaýaptylyqty qataıtý usynylady. Sonymen birge, aýyl turǵyndaryn qoldaýdyń jańa sharalary da qarastyrylady.
Jalpy alǵanda zań jobasy Qazaqstannyń DSU-ǵa kirý jaǵdaıynda aýyl sharýashylyǵy kesheniniń básekege qabilettiligin arttyrýǵa múmkindik beredi.
