Senat advokattyq qyzmet týraly zań qabyldady
ASTANA. QazAqparat - Parlament Senatynyń jalpy otyrysynda palata depýtattary «Advokattyq qyzmet jáne zań kómegi týraly» Zańyn qabyldady, dep habarlaıdy QazAqparat tilshisi.
«Advokattyq qyzmet jáne zań kómegi týraly» zań jobasy 2010 jyldan 2020 jylǵa deıingi kezeńge arnalǵan quqyqtyq saıasat tujyrymdamasyn oryndaý maqsatynda ázirlendi. Búgingi tańda zań kómegin alý konstıtýtsııalyq quqyǵy kelesi máselelerge baılanysty tıisti deńgeıde júzege asyrylmaıdy. Birinshiden, Qazaqstanda advokattyq qyzmet naryǵy jetkilikti deńgeıde damymaǵan jáne ozyq elderdiń kórsetkishterine sáıkes kelmeıdi. Onyń negizgi sebepteriniń biri - advokattardyń jetispeýi. Ol óz kezeginde úmitkerler úshin negizgi máselelerdiń biri bolyp tabylatyn óte joǵary kirý jarnalarynan týyndaıdy. Alǵashqy jarnalardyń alynyp tastalýy advokattyq mamandyqqa jas zańgerlerdiń kirýine, advokattardyń arasyndaǵy básekelestikti kúsheıtýge jáne olardyń sanynyń artýyna múmkindik beredi», - dep toqtaldy mınıstr.
Ekinshiden, Qazaqstanda advokattar kórsetetin kásibı qyzmetterdiń sapasyn tıimdi baqylaý joq. Advokattardyń kásibı ádep normalaryn saqtaýyn, tártiptik isterdiń obektıvti jáne jan-jaqty qaralýyn qamtamasyz etý maqsatynda eki deńgeıli tártiptik komıssııany qurý qarastyrylǵan.
«Úshinshiden, Qazaqstanda advokattardyń biliktiligin arttyrý tetigi qalyptaspaǵan. Advokatýranyń sapalyq quramyn jaqsartý maqsatynda zań jobasymen advokattardyń biliktiligin kóterý tetigi qarastyrylǵan», - dedi M. Beketaev.
Sonymen qatar, zań jobasymen halyqtyń áleýmettik álsiz toptaryna advokattarmen jáne zań konsýltanttarymen quqyqtyq jaǵdaıdyń basynan aıaǵyna deıin tegin zań kómegin kórsetý qarastyrylǵan. Ol - pro bono dep atalady. Aıta ketý qajet, rro bono qyzmeti mindet emes, ol quqyq bolyp tabylady jáne ony kórsetý májbúrli bolmaıdy.
«Búgingi tańda sottarda azamattyń múddesin zań bilimi bar kez kelgen adam bildire alady. Alaıda osyndaı kómek sapasyz kórsetilgen jaǵdaıda azamattar óz quqyqtaryn qorǵaı almaıdy. Osy oraıda sottarda ókildik etetin jeke tulǵalardyń zań konsýltanttary palatalaryna mindetti túrde múshelikte bolýy qarastyrylǵan», - dedi mınıstr.
Onyń aıtýynsha, búginde azamattardy teris pıǵyldy advokattar men zań konsýltanttarynan qorǵaý tetigi eskerilmegen. Bul rette advokattardyń, zań konsýltanttarynyń mindetti túrde óz kásibı jaýapkershiligin saqtandyrý engiziledi.
«Sonymen qatar, advokattyq orderdi paıdalaný tájirıbesi onyń tıimsizdigin kórsetip otyr.Advokattyq orderdi alyp tastaý - advokattyń qyzmetin ońtaılandyrýǵa, onyń advokattyq uıymnan táýelsiz bolýyna, sondaı-aq ýaqyt pen qarjy shyǵyndaryn azaıtýǵa jol ashady», - dep naqtylady vedomstvo basshysy.
Munymen qosa, jalpy otyrysy barysynda palata depýtattary «QR keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» Zańyn ekinshi oqylymda qabyldady.
