Senat Adam quqyqtary jónindegi ýákil týraly zań jobasyn Májiliske qaıtardy
«Ýákil zań jobasynda táýelsiz jáne eshbir memlekettik organ men laýazymdy tulǵalarǵa esep bermeıtin jaýapty memlekettik laýazymdy ıelenetin tulǵa retinde aıqyndalady. Adam quqyqtary jónindegi ýákilge onyń qylmystyq jaýaptylyǵyna nemese ákimshilik jaýapkershiligine qol suǵylmaýshylyq mártebesi beriledi jáne kýágerlik aıǵaqtar berýden bosatylady. Ombýdsmenniń zańdy qyzmetine aralasýǵa ne kedergi keltirýge tyıym salynady. Adam quqyqtary jónindegi ýákilge kelsek, onyń qyzmetine qatysty kelesi ózindik talaptar men shekteýler kózdeledi: saıası qyzmetpen aınalysýǵa, memlekettik qyzmette bolýǵa, saıası partııalarǵa qatysýǵa tyıym salý jáne taǵy da basqa», - dedi joǵarǵy palatanyń jalpy otyrysynda Senat Tóraǵasynyń orynbasary Asqar Shákirov.
Onyń atap ótýinshe, ombýdsmenniń ókilettikteri aıtarlyqtaı keńeıedi.
«Ýákil mynadaı quqyqtarǵa ıe: Prezıdentke, Parlament pen Úkimetke adam men azamattyń quqyqtary men bostandyqtaryn kótermeleý jáne qorǵaý máseleleri boıynsha Qazaqstan Respýblıkasynyń zań jobalaryn ázirleý, zańnamasyn jetildirý jóninde usynystar engizý; shaqyrylǵan jaǵdaıda Parlament palatalarynyń, Úkimettiń, Konstıtýtsııalyq Keńestiń, memlekettik organdarda qurylǵan alqalyq jáne basqa da organdardyń, sondaı-aq máslıhattardyń otyrystaryna qatysýǵa; adamnyń jáne azamattyń quqyqtary men bostandyqtaryn buzǵan adamǵa qatysty tártiptik nemese ákimshilik is júrgizý ne qylmystyq isti júzege asyrý týraly ótinishhatpen memlekettik organdarǵa nemese laýazymdy adamdarǵa júginýge; memlekettik apparattyń sheshimderimen nemese áreketterimen (áreketsizdigimen) buzylǵan shektelmegen adamdar tobynyń quqyqtary men bostandyqtaryn qorǵaý úshin talap aryzben (talap qoıýmen) sotqa júginýge jáne basqalar. Mundaı sharalar sózsiz Ombýdsmen ınstıtýtyn nyǵaıtady», - dedi Senat tóraǵasynyń orynbasary.
Talqylaý barysynda Senat depýtattary zań jobasyna túzetýler engizip, Májiliske qaıtardy.
