Senat 2022-2024 jyldarǵa arnalǵan respýblıkalyq bıýdjet týraly zańǵa túzetý engizdi
Qarjy mınıstri Erulan Jamaýbaev Prezıdent tapsyrmalaryn oryndaýǵa 1,8 trln teńge, áleýmettik shyǵystar men teńge baǵamyna – 173 mlrd teńge, baǵdarlamalyq qujattar men shuǵyl mindettemelerge – 476 mlrd teńge qarastyrylǵanyn aıtqan edi.
«Bıylǵa arnalǵan respýblıkalyq bıýdjet parametrleri kelesideı qalyptasty. Bıýdjet túsimderi 2,7 trln teńgege ulǵaıyp, 15,8 trln teńgeni quraıdy. Tapshylyq jalpy ishki ónimge 3,3% deńgeıinde saqtaldy. Respýblıkalyq bıýdjet shyǵystary 18,8 trln teńge kóleminde josparlanyp otyr. Shyǵystardyń qosymsha ulǵaıýy 2,7 trln teńge bolady jáne birneshe basym baǵyttarǵa kózdelgen», - dedi Qarjy mınıstri Senat otyrysynda.
Sondaı-aq, bıýdjettiń jalpy shyǵystarynyń 46%-y áleýmettik salaǵa baǵyttalyp otyr.
«Áleýmettik blok shyǵystary 581 mlrd teńgege ulǵaıtyldy jáne 8,6 trln teńge nemese bıýdjettiń jalpy shyǵystarynyń 46%-y deńgeıinde josparlanýda. Qosymsha qarajat áleýmettik tólemderdi ındeksteýge, medıtsınalyq kómek kórsetýge, eńbek naryǵyn damytýǵa jáne jastardy qoldaýǵa baǵyttalatyn bolady», - dedi E. Jamaýbaev.
Mınıstrdiń aıtýynsha, kúsh qurylymy shyǵystary 446 mlrd teńgege ósip, 2,2 trln teńge somasynda josparlanǵan.
«Jalpy kózdelgen shyǵystardyń 30%-ke jýyǵy nysanaly transferttermen óńirlerge beriletin bolady. Olardyń jalpy somasy 818 mlrd teńge bolsa, onyń ishinde damýǵa arnalǵan transfertter – 475 mlrd teńge. Naqtylaýdy eskere otyryp, óńirlerge respýblıkalyq bıýdjetten jalpy shyǵystardyń 5,5 trln teńgeden astamy nemese 29,3%-i baǵyttalatyn bolady», - dedi E. Jamaýbaev.
