Senat 2016 jylǵa arnalǵan Negizgi is-sharalar josparyn bekitti

ASTANA. QazAqparat - Búgin Parlament Senatynyń Bıýrosy ótip, onda 24 jeltoqsanda bolatyn Palata otyrysynyń kún tártibi naqtylandy. Sonymen qatar Bıýro músheleri Parlament Senatynyń 2016 jylǵa arnalǵan Negizgi sharalar josparyn bekitti. Bul týraly palatanyń baspasóz qyzmetinen habarlandy.

Bıýro usynysyna sáıkes, aldaǵy otyrysta senatorlar «Atom energııasyn paıdalaný týraly» jáne «Baǵaly metaldar men asyl tastar týraly» zań jobalaryn talqylaıtyn bolady. Budan bólek, «Qazaqstan Respýblıkasynyń keıbir zańnamalyq aktilerine baǵaly metaldar men asyl tastar máseleleri boıynsha ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine atom energııasyn paıdalaný máseleleri boıynsha ózgerister men tolyqtyrýlar engizý týraly» ilespe zań jobalary birinshi oqylymda talqylanady. Sonymen qatar Senat sporttyq-buqaralyq, oıyn-saýyq mádenı-buqaralyq is-sharalar ótkizý kezinde qaýipsizdikti qamtamasyz etýge baǵyttalǵan qujatty ekinshi oqylymda qaraıdy. «Bıýro músheleri Parlament Senatynyń 2016 jylǵa arnalǵan Negizgi sharalar josparyn da bekitti. Bul rette Qazaqstan Respýblıkasynyń Prezıdenti N.Á.Nazarbaevtyń «Qazaqstan jańa jahandyq naqty ahýalda: ósim, reformalar, damý» Joldaýyn, «Bes ınstıtýttyq reformany júzege asyrý jónindegi 100 naqty qadam» Ult josparyn iske asyrýǵa baǵyttalǵan zań jobalaryn qaraý, sondaı-aq Joldaýdy túsindirý men nasıhattaý senatorlardyń aldaǵy jylǵy jumysynyń basty baǵyty bolyp belgilengen. Senat sondaı-aq «Din terrorızmge qarsy» halyqaralyq konferentsııasyn, birqatar kóshpeli otyrystardy, dóńgelek ústelderdi, memlekettik jáne jergilikti organdardyń ókilderimen kezdesý ótkizýdi josparlap otyr», - delingen baspasóz baıanynda.