Sen álemdi ózgertý úshin dúnıege keldiń — ýkraın qyzynyń talanty Dımashty tańǵaldyrdy
ASTANA. KAZINFORM — «Sen álemdi ózgertý úshin dúnıege kelgensiń». Dımash Qudaıbergen Majarstandaǵy Virtuosos V4+ talanttar baıqaýynyń fınalynda óner kórsetken ýkraınalyq Amelııa Anısovıchke osyndaı pikir aıtty.
Amelııanyń basqa qatysýshylardan ereksheligi — ol buǵan deıin óz elindegi soǵys kezinde bombadan qorǵanatyn panajaıda án shyrqap, bolashaqqa degen úmit pen senimniń sımvolyna aınalǵan edi. Sol sáttegi vıdeosy áleýmettik jelilerde keń tarap, ónerpaz búldirshin álemge tanylǵan bolatyn.
Tanymal ánshi Dımash Qudaıbergen Majarstandaǵy Virtuosos V4+ talanttar baıqaýynda qazylyq etti. Virtuosos V4+ — ózgeshe formatty klassıkalyq mýzyka alańyndaǵy talanttar shoýy. Ol jas ártisterdiń talantyn ashýǵa jáne jas mýzykanttardyń damýyna múmkindikter beretin erekshe shoý.
Baıqaý Majarstannyń jetekshi mýzykalyq joǵary oqý orny — Býdapeshttegi Frants Lıst atyndaǵy mýzyka akademııasynda ótedi. Halyqaralyq qazylar alqasynyń quramynda Dımashtan bólek álemdik ánshi Plasıdo Domıngo, gıtarıst Pablo Saınts Vılegas, Cheskı Krýmlov atyndaǵy halyqaralyq mýzyka festıvaliniń kórkemdik jetekshisi Gabrıela Rachıdı, prodıýser Harvı Goldsmıt jáne tanymal vıolonchelıst Stepan Haýzer bar.
Joba fınalynda Majarstan, Polsha, Slovakııa, Ýkraına, Chehııadan kelgen jas mýzykanttar óner kórsetti. Olar fortepıano, klarnet, goboı, skrıpka jáne arfada oınady. Kóptegen qatysýshylar qazylar alqasynyń jeke maqtaýyna ıe boldy, al Polshadan kelgen goboı ryndaýshysy Malgorjata Tseshko Dımashtan jeke kontsertke qatysýǵa shaqyrý aldy.
Sonymen birge, Dımash Ýkraınadan kelgen baıqaýdyń eń kishkentaı qatysýshysy Amelııa Anısovıchtiń daýysyn erekshe maqtady. Amelııa Anısovıch 9 jasta. Ol Ýkraındaǵy bombadan qorǵanatyn panajaılarda adamdarǵa úmit pen qýanysh syılaý úshin, kóńilin aýlaý úshin án salýyn toqtatpaǵan. Baıqaý fınalynda «Muzdy ólke» anımatsııalyq fılminiń «Let it go» saýndtregin oryndaǵan. Baıqaý uıymdastyrýshylary Amelıdi úmit pen beıbitshiliktiń jáne batyldyqtyń sımvoly dep atap ketti.
«Qatty tań qalyp otyrmyn. Talantyń úshin rahmet. Sen álemdi ózgertý úshin dúnıege keldiń dep oılaımyn», — dedi Dımash Qudaıbergen.
Shoý fınalynda halyqaralyq qazylar alqasynyń mýzykanttary Erık Mıklosh, kishi Plasıdo Domıngo, Dımash Qudaıbergen, Elına Nechaeva, klassıkalyq gıtarıst Petar Chýlıch jáne Amelııa Anısovıch Pannon fılarmonııalyq orkestriniń súıemeldeýimen Maıkl Djeksonnyń áıgili «Heal the World» ánin shyrqady.
Sonymen birge Dımash 20 ǵasyrdyń eń uly daýsy maestro Plasıdo Domıngomen Jorj Bızeniń «Іnjý-marjan jınaýshylar» operasynan Nadır men Zýrganyń «Au Fond du Temple Saint» dýetin oryndady.
