Semserlesýden Qazaqstan erler quramasy álem chempıonatynyń qola júldesine talasady
ASTANA. KAZINFORM – Qazaqstan erler quramasy semserlesýden Olımpıada júldegerlerine jol berdi. Endi olar álem chempıonatynyń qola medaline talasady.
Otandastarymyz Tbılısıde ótip jatqan álem birinshiliginde komandalyq básekeniń jartylaı fınalyna deıin jetti.
Atalǵan kezeńde Kırıll Prohodov, Rýslan Kýrbanov, Vadım Sharlaımov pen Elmır Álimjanov Parıj-2024 Olımpıadasynyń kúmis júldegeri Japonııa quramasyna ese jiberdi. Tartysqa toly kezdesý 42:41 esebimen qarsylastardyń paıdasyna aıaqtaldy.
Aıta keterligi, qazaqstandyqtar jekpe-jektiń sońyna deıin basymdyqqa ıe bolǵanymen, japonııalyqtar esepti teńestirip, sońynda jeńisti julyp aldy.
Qola medal úshin Qazaqstan quramasy Majarstan – Frantsııa jubynyń jeńilis tapqan komandasymen kim myqtyny anyqtaıdy.
Buǵan deıin Qazaqstan erler quramasy semserlesýden álem chempıonatynyń shırek fınalyna shyǵý úshin baq synaıtynyn habarladyq.