Semserlesýden Azııa chempıonatynda Qazaqstan qorjynyna taǵy bir medal tústi
ASTANA. KAZINFORM — Úndistannyń Delı qalasynda ótip jatqan semserlesýden 2026 jylǵy Azııa chempıonatynda komandalyq jarystar bastaldy. Bul týraly UOK málim etti.
Qazaqstandyq qylyshshylar qurlyq birinshiliginde úshinshi oryn alyp, el qorjynyna kezekti medal saldy.
Týrnır barysynda Qazaqstan quramasy Irandy (45:33) jáne Ózbekstandy (45:43) jeńdi. Alaıda jartylaı fınalda qazaqstandyq sportshylar Olımpıada chempıondary sanalatyn Ońtústik Koreıa quramasyna 34:45 esebimen ese jiberdi. Nátıjesinde komanda jarysty qola medalmen aıaqtady.
Júldegerler qatarynda Artem Sarkısıan, Janat Nábıev, Nurmuhammed Jaılybaı jáne Nazarbaı Sattarhan bar.
Aıta keteıik, buǵan deıin osy chempıonatta shpagashy Irına Bakaldına altyn medal jeńip alsa, Rýslan Kýrbanov qola júldeger atanǵan bolatyn.
Buǵan deıin Irına Bakaldına semserlesýden Azııa chempıonatynda altyn medal jeńip alǵanyn jazdyq.
