Semserlesýden Astanadaǵy álem kýbogyna 46 elden 500-ge jýyq sportshy qatysyp jatyr
ASTANA. KAZINFORM – Astanada erler men áıelder arasynda sapy boıynsha semserlesýden álem kýbogy ótip jatyr. Bul – Halyqaralyq semserlesý federatsııasy (FIE) qoldaýymen uıymdastyrylatyn mańyzdy týrnırlerdiń biri. Qazaqstan mundaı deńgeıdegi jarysty tarıhta alǵash ret qabyldap otyr.
FIE halyqaralyq kúntizbesine jyl saıyn osy sanattaǵy nebary 5 týrnır enedi. Atalǵan jarys dástúrli túrde Shveıtsarııa, Germanııa, BAÁ jáne Kanadada ótedi. Bıyldan bastap bul tizimge alǵash ret Qazaqstan qosylyp, Ortalyq Azııada álem kýbogyn ótkizý quqyǵyna ıe bolǵan alǵashqy el atandy.
Jarys 26-29 naýryz kúnderi Astanada ótip jatyr. Týrnırge álemniń 46 elinen shamamen 500 sportshy qatysýda: olardyń 222-si – áıelder, 272-si – erler. Komandalyq saıystarǵa 31 erler jáne 23 áıelder quramasy qatysady. Bapkerler, tóreshiler men uıymdastyrýshylardy qosqanda, qatysýshylardyń jalpy sany 1 000 adamnan asady.
Ashylý saltanatyna Týrızm jáne sport mınıstri Erbol Myrzabosynov qatysty.
– Memleket basshysynyń tapsyrmasymen sport salasynda aýqymdy reformalar júzege asyrylyp jatyr. Sonyń alǵashqy nátıjeleri qazirdiń ózinde baıqalýda. Bıyldan bastap balalar men jasóspirimder sport mektepteri bapkerleriniń jalaqysy 30%-ǵa artty. Balalar sportyna bólinetin qarjy shamamen eki esege kóbeıdi. Basym sport túrleri aıqyndaldy, legıonerlerdi memlekettik qarjylandyrý toqtatyldy, ulttyq sport túrlerine olımpıadalyq sport túrlerimen teń mártebe berildi. Sondaı-aq halyqaralyq yntymaqtastyq keńeıip keledi. Sportshylarymyz halyqaralyq arenada tabysty óner kórsetip, el abyroıyn asqaqtatýda. Áleýetti sport rezervi qalyptasyp, balalar sporty damyp kele jatqanyn aıta ketken jón. Osyndaı deńgeıdegi jarystyń elimizde ótýi – Qazaqstannyń halyqaralyq sport arenasyndaǵy bedeliniń artyp kele jatqanyn kórsetedi, - dedi mınıstr.
Týrnırde Qazaqstan atynan 30 sportshy baq synap jatyr. Olardyń qatarynda Rýslan Qurbanov, Elmır Álimjanov, Erlik Sertaı, Kırıll Prohodov jáne Vadım Sharlaımov bar. Áıelder arasynda 24 sportshy óner kórsetedi, olardyń ishinde Ýlıana Pıstsova, Sofııa Nıkolaıchýk, Karolına Fomına jáne Vladıslava Andreeva bar.
Eske sala keteıik, byltyr Qazaqstan quramasy semserlesýden álem chempıonatynda qola júlde ıelenip, tarıhı jetistikke qol jetkizgen edi. Al 2024 jylǵy Parıj Olımpıadasynda ulttyq qurama 6-oryn aldy. Qurama tabysyna arnaıy shaqyrylǵan bas bapker Oleksandr Gorbachýk zor úles qosyp otyr. Onyń jetekshiligimen Japonııa quramasy Tokıo jáne Parıj Olımpıadalarynda, sondaı-aq 2018 jáne 2022 jylǵy Azııa oıyndarynda chempıon atanǵan.
Buǵan deıin Rýslan Qurbanov álem kýbogynyń jartylaı fınalyna joldama alǵanyn habarladyq.
