Semserlesýden álem kýboginde tuńǵysh ret qazaqstandyq jasóspirim júlde aldy
ALMATY. QazAqparat – Ádemi Serikbaı Almaty qalasynda ótip jatqan semserlesýden jasóspirim qyzdar arasyndaǵy álem kýboginiń qola júldegeri atandy, dep habarlaıdy Qazaqparat Sportty damytý dırektsııasynyń baspasóz qyzmetine silteme jasap.
16 jastaǵy Ádemi Serikbaı 1/8 kezeńde túrkııalyq, al shırek fınalda ózbekstandyq sportshyny 15:9 esebimen utty. Al, jartylaı fınalda keıinnen chempıon atanǵan ońtústik koreıalyq Kım Na Iege ese jiberdi. Buǵan deıin qazaqstandyqtar jasóspirimder arasynda álem kýboginde júldegerler qataryna kirip kórmegen. Jalpy, bul jekeleı básekege 10 eldiń 50 sportshysy qatysty.
Aıta keteıik, Almatyda elimizde alǵash ret semserlesýden álem kýbogi ótip jatyr. Jarystyń resmı ashylýyna Sportty damytý dırektsııasynyń dırektory Oralbaı Jaqsymbetov, Qazaqstan semserlesý federatsııasynyń prezıdenti Mırbýlat Abýov, semserlesýden Memlekettik jattyqtyrýshy Tımýr Baıtasov qatysyp, jınalǵan sportshylarǵa sáttilik tiledi.
«Búgin bárimiz tartysqa, emotsııaǵa toly sport túri sanalatyn semserlesýden jasóspirimder arasyndaǵy álem kýboginiń bastalýyna kýáger bolyp turmyz. Mundaı deńgeıdegi jarys bizdiń elimizde alǵash ret ótkeli jatqanyn aıta ketý kerek.
Qazir Qazaqstanda semserlesý sportyna degen qyzyǵýshylyq artyp keledi. Buǵan Ulttyq quramamyzdyń Álem jáne Azııa chempıonatyndaǵy aıtýly kórsetkishteri serpin berip keledi. Jerlesterimiz turaqty túrde Olımpıadada óner kórsetip júr.
Bizdiń osy jarystan kúterimiz kóp. Nege deseńizder, týrnırden keıin kelesi jylǵy Álem jáne Azııa chempıonatyna qatysatyn elimizdiń jastar quramasy jasaqtalady. Ásem qala Almatyǵa osy týrnırge qatysý úshin 10 shaqty eldiń jas sportshylary jınaldy. Bul júldege qol jetkizý ońaı bolmaıtynyn baıqatady, ıaǵnı naǵyz baby men baǵy keliskender ǵana top jarady degen sóz», - dedi Oralbaı Jaqsymbetov.
Álem kýboginiń sońǵy kúni komandalar arasynda úzdikter atyqtalady. Onda Qazaqstan, Bolgarııa, Túrkııa, Ońtústik Koreıa, Germanııa, Úndistan, Aýstralııa, Ózbekstan, Gonk-Kong, Grýzııa qyzdary sheberlik baıqasady.
