Semserlesý: Qazaqstan erler quramasy Olımpıadada Vengrııadan jeńilip qaldy

PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda semserlesýdiń shpaga túrinen komandalyq jarystyń shırek fınalynda Qazaqstan erler quramasy Vengrııadan jeńilip qaldy.

Atalǵan synda Qazaqstan quramasynan el namysyn qorǵaǵan sportshylarymyz - Elmır Álimjanov, Rýslan Qurbanov, Vadım Sharlaımov qarsylastaryna 30:45 esebimen jol berip, júldeden tys qaldy. Osylaısha Qazaqstan semserlesý quramasy da Olımpıadany sátsiz aıaqtady.

Esterińizge sala keteıik, osyǵan deıin Qazaqstannyń eki birdeı jeńil atleti Elızaveta Matveeva men Nadejda Dýbovıtskaıa Parıj Olımpıadasynyń irikteý kezeńinen ary asa almaǵanyn jazǵan edik.

Frantsııa astanasy Parıj qalasynda ótip jatqan XXXIII jazǵy Olımpıada oıyndary 11 tamyzda máresine jetedi.

Búgin qazaqstandyq sportshylar sporttyń 8 túrinen - stendtik atý, akademııalyq esý, dzıýdo, jeńil atletıka, júzý, semserlesý, boks jáne batýt gımnastıkasynan synǵa túsip jatyr.