Semserlesý: Qaraǵandyda 100-den astam jasóspirim kúsh synasýda
QARAǴANDY. QazAqparat - Qaraǵandyda 13 jasar sportshylar arasynda semserlesý boıynsha respýblıkalyq birinshilik ótýde, dep habarlaıdy QazAqparat tilshisi.
Bul sport túri oblysymyzda jýyrda ǵana damı bastady, degenmen tabysty óner kórsetip jatqan sportshylarymyz bar. Saıysqa elimizdiń túpkir-túpkirinen 100-den astam jas semsershiler jınaldy.
«Semserlesý bólimin biz 2003 jyly ashtyq. Ol kezde sektsııada 25 bala jattyǵatyn, al qazir olardyń qatary 116-ǵa jetti. Іlgerilep bara jatqanymyz aıtpaı-aq ta kózge kórinip tur. Qazaqstan chempıonaty birinshi ret uıymdastyrylyp otyr, oǵan 2005 jylǵy jasóspirimder qatysýda. Bul birinshilik Qaraǵandyda ótip otyrǵany qýanyshty», - deıdi «Jalyn» qaraǵandylyq sport mektebiniń basshysy Maıra Isaeva.
Jas semsershiler úsh túrli saıysqa tústi: semser, qylysh, rapıra. Birinshiliktiń alǵashqy kúninde qaraǵandylyqtar jaqsy nátıje kórsetip úlgerdi. Qylyshpen óner kórsetken qyzdar jalpy komandalyq ekinshi oryndy ıelendi, al uldar úshinshi orynǵa qol jetkizdi.
