«Semser» arnaýly oqý ortalyǵynyń 3 jyldyǵyna oraı Almatyda halyqaralyq ǵylymı-tájirıbelik konferentsııa ótti
ASTANA. 10 qarasha. QazAqparat /Aıdar Ospanalıev/ - «Búgin Almatyda «Semser» kompanııalar tobynyń bastamasymen «Semser» arnaýly oqý ortalyǵynyń qurylýyna 3 jyl tolýyna oraı «Strategııalyq jáne basqa da qaýipti óndiristik obektilerdiń keshendi qaýipsizdik júıesin qamtamasyz etýdiń kókeıkesti máseleleri» atty halyqaralyq ǵylymı- tájirıbelik konferentsııa ótti»,
dep habarlaıdy «QazMunaıGaz» ulttyq kompanııasynyń baspasóz qyzmeti.
Baspasóz málimetterine qaraǵanda, atalǵan sharaǵa 40 astam ulttyq kompanııalardyń ókilderi qatysty. Sonyń ishinde «Samuryq- Qazyna» ál-aýqat qory tobyna kiretin «Tengızshevroıl», «Qarashyǵanaq Petrolıým Opereıtıng», «Gazprom», «LÝKOIL» sııaqty ózge de birqatar iri otandyq jáne sheteldik kompanııalardyń ókilderi bar. Jıynǵa sonymen qatar Іshki ister, Tótenshe jaǵdaılar mınıstrlikteri men Ulttyq qaýipsizdik komıtetiniń sondaı-aq ózge de birqatar memlekettik organdar men qoǵamdyq birlestiktiń saraptamalyq ortalyqtardyń ókilderi qatysty.
Konferentsııa barysynda qazirgi qaýip-qaterler, sonyń ishinde ekstremıstik, terrorıstik baǵyttaǵy áreketterdiń aldyn alý maqsatynda strategııalyq jáne basqa qaýipti óndiristik obektilerdiń qaýipsizdik júıesin qamtamasyz etýge baılanysty ózekti máseleler talqylandy. Sondaı-aq májilis barysynda memlekettik emes kúzet uıymdarynyń, órtke qarsy jáne apattyq- qutqarý salasy qyzmetkerleriniń kásibı daıyndyq máselesi sóz boldy.
Buǵan qosa konferentsııada «Semser» oqý ortalyǵynyń ókilderi mamandardy atys daıarlyǵyna jattyqtyrý, jarylys zattaryn arnaıy úıretilgen ıttermen izdestirý, jedel áreket etý toptarynyń ózara árekettesýi, zardap shekkenderge alǵashqy dárigerlik kómek kórsetý sııaqty sharalar boıynsha tájirıbelerimen bólisti.
