Semizdikke shaldyqqandardyń barlyǵyna birdeı operatsııa jasaı almaımyz - hırýrg Almantas Malıatskas
ASTANA. QazAqparat - Salmaqty tómendetip, asqazandy kishireıtetin barıatrıkalyq hırýrgııa búginde medıtsınalyq jáne ekonomıkaly turǵyda jaqsy nátıje berýde. Bul týraly búgin Ortalyq kommýnıkatsııalar qyzmetindegi baspasóz máslıhatynda Lıtva Medıtsınalyq ýnıversıtetiniń professory, hırýrg Almantas Malıatskas málim etti.
«Semizdiń problemasy úlken, sebebi búginde álemde bul epıdemııa retinde beleń alýda. Sondyqtan ony dert dep qabyldaǵan jón. Adamǵa 40-50 keli salmaq túsirý úshin eleýli erik kúshi kerek, ıaǵnı artyq salmaqtan qutylý ońaı emes. Óıtkeni, bul turǵyda birneshe faktorlar bar. Olardyń birine toqtalatyn bolsam, semizdik problemasynyń 60-70 paıyzy genge baılanysty, al gendi ózgertý nemese oǵan qarsy turý da óte qıyn», - deıdi ǵalym.
Onyń sózine qaraǵanda, sońǵy kezde ǵylym salmaǵy shekten tys emdelýshilerde toqshylyqty retteıtin gormondar azdaý bolatyndyǵyn anyqtady.
«Qazirgi kezde azyq-túlik pen taǵam túrlerine qoljetimdilik óte joǵary deńgeıde, sondaı-aq tamaqtyń maılylyǵy da az emes. Osy oraıda adamdardyń ózderiniń genderine qarsy turý ońaı emes. Bul salmaǵy shekten tys aýyr adamdarǵa operatsııasyz salmaq joǵaltý óte qıynǵa túsedi. Biz hırýrgter retinde semizdikke shaldyqqandardyń barshasyna operatsııa jasaı almaıtyndyǵymyzdy túsinemiz. Alaıda, júrek-qantamyr aýrýlary, qant dıabeti sekildi ilespe dertteri paıda bolatyn naýqastar bar. Salmaqty tómendetip, asqazandy kishireıtetin barıatrıkalyq hırýrgııa búginde medıtsınalyq jáne ekonomıkaly turǵyda jaqsy nátıje berýde. Naýqastar operatsııadan keıin ózderin jaqsy sezinedi», - dedi Almantas Malıatskas.
