«Semiz polıtseıler san soǵyp qalýy múmkin» - respýblıkalyq basylymdarǵa sholý
***
Keshe Aqordada Elbasy - Qazaqstan Respýblıkasy Qarýly Kúshteriniń Joǵarǵy Bas qolbasshysy Nursultan Nazarbaev 7 mamyr - Otan qorǵaýshy kúnine jáne elimizdiń Qarýly Kúshteriniń 20 jyldyq mereıtoıyna baılanysty eldiń ulttyq qaýipsizdigi men qorǵanys qabiletin qamtamasyz etýge eleýli úles qosqan bir top áskerı qyzmetshiler, quqyq qorǵaý organdary men ulttyq qaýipsizdik qyzmetkerlerine joǵary áskerı shender men arnaýly ataqtar tapsyryp, memlekettik nagradalarmen marapattady. Memleket basshysy marapattaý rásiminde barsha Qazaqstan halqyn, onyń ishinde áskerı qyzmetkerlerdi, jaýyngerlerdi, Uly Otan soǵysynyń ardagerleri men barlyq áskerı boryshyn ótegen azamattardy Otan qorǵaýshy kúnimen quttyqtap, ıgi tilekterin jetkizdi. «Táýelsizdik alǵan 20 jyldyń ishinde biz Qazaqstannyń tól ofıtserlerin daıyndap shyǵardyq. 20 jyldyń ishinde sizder áskerı qyzmettiń neshe túrli satysynda bolyp, ózderińizdiń qyzmetke degen adaldyqtaryńyzben, otansúıgishtikterińizben kózge túsip, osyndaı dárejege jettińizder. Bul kúndi men Joǵarǵy Bas qolbasshy retinde ózimniń Jarlyǵymmen dárejesin kóterip, memlekettik mereke retinde belgiledim. Bul - bizdiń jastardy tárbıeleý úshin, patrıottyq sezimdi oıatý úshin jasalyp otyrǵan shara», - dedi Elbasy. Bul týraly «Egemen Qazaqstan» gazetiniń búgingi sanynda jaryq kórgen «Adaldyqqa laıyqty marapat» atty maqalada jazylǵan.
Atalmysh basylym Keńes Odaǵynyń Batyry, Halyq Qaharmany, armııa generaly Saǵadat Nurmaǵambetovten alǵan suhbatyn jarııalady. «Qýatty ásker - turaqtylyq pen qaýipsizdik kepili» degen taqyryptaǵy bul suhbatta Halyq Qaharmany áskerı salada boıynsha óz oıymen bólisedi. «Óz tarıhynda talaı ret qolyna qarý alyp, bostandyq pen táýelsizdikti qorǵaýǵa týra kelgen qazaq halqynyń erligi men qaharmandyǵyn eske túsirý meıilinshe ádiletti bolmaq dep oılaımyn. Degenmen, qazaq halqynyń san ǵasyrlyq tarıhynda qara kúshti sanadan eshqashan joǵary qoımaǵanyn atap ótkim keledi. Bizdiń ata-babalarymyzdyń ózge eldiń jerlerin jaýlap almaq bolǵan jaǵdaılary tarıhta bolǵan emes. Olar jat jurttyq basqynshylar jerlerin jaýlap alyp, ózderin ezgige salmaq bolǵan kezderde ǵana batyrlyq pen qaısarlyq tanyta otyryp, kúshke júgingen»,-deıdi S. Nurmaǵambetov.
***
Keshe 59 jastaǵy Vladımır Pýtın araǵa bir merzim salyp úshinshi márte Reseı Prezıdenti retinde ulyqtaý rásimin ótkizdi. Pýtın bıylǵy 4 naýryzda ótken saılaýda 63,75 paıyz daýys jınap, Reseıdiń ekinshi (B. Eltsın) jáne (D. Medvedevten keıin) tórtinshi prezıdenti taǵyna kóterildi. Kórshi eldegi Konstıtýtsııalyq ózgeristerge baılanysty V. Pýtın endi tórt jylǵa emes, alty jylǵa, ıaǵnı 2018 jylǵa deıin prezıdenttik ókilettigin atqaratyn bolady. Atalǵan tulǵanyń Kremlge qaıta oralýy men onyń ıdeologııasy «Alash aınasy» basylymynda «Pýtınniń úshinshi kezegi» atty taqyryptaǵy maqalada keńinen jazylǵan.
Sondaı-aq, «Almatyda bokstan Elbasy kýbogynyń júldesi jolyndaǵy halyqaralyq týrnır máresine jetip, jerlesterimiz jeti altynǵa qol jetkizdi. Onyń altaýyn ulttyq quramanyń birinshi nómirlileri ıelense, taǵy bir altynǵa Qazaqstan-2 komandasynyń ókili Áset Qasymov qol jetkizdi. Qalǵan úsh altyn qonaqtarǵa buıyrdy»,-dep jazady «Alash aınasy»gazeti. Maqala «Elbasy kýbogyndaǵy jetistigimiz - jeti altyn» degen taqyryppen berilgen.
***
Mańǵystaý oblystyq ishki ister departamentiniń bastyǵy, general-maıor Meıirhan Jamanbaev artyq salmaǵy bar, naqtyraq aıtqanda, quqyq qorǵaý organdarynyń semiz polıtseıleri óz erkimen qyzmetten ketýi tıis degen turǵyda usynys aıtty. Bul málimdemeni ol ishki ister organdary qyzmetkerleriniń dene bitimi daıyndyǵyn tekserýge qatysty bolǵan daıyndyq sharasy barysynda aıtty. Bul habardy «Aıqyn» gazeti jarııalap otyr. Bul aqparat «Semiz polıtseıler san soǵyp qalýy múmkin» degen taqyryppen jazylǵan.
***
«Kazahstanskoı pravda» gazetinde keshe Aqorda Elbasy Nursultan Nazarbaevtyń birqatar áskerı qyzmetkerge arnaýly ataqtar men shenderdi tabys etkendigi berilgen.
Atap aıtqanda, general-leıtenant sheni QR Qorǵanys mınıstrligi Shtab bastyqtary komıteti tóraǵasynyń birinshi orynbasary Nurlan Jolamanovqa, avıatsııa general-maıory sheni QR Qorǵanys mınıstrligi Áýe qorǵanys kúshteri bas qolbasshysynyń orynbasary Asqar Bóldeshevke, general-maıor sheni «Ońtústik» Óńirlik qolbasshylyq áskerleri qolbasshysynyń birinshi orynbasary Sultan Kamaletdınovke, general-leıtenat sheni QR UQK tóraǵasynyń birinshi orynbasary Vladımır Jumaqanovqa, general-maıor sheni QR UQK Saraptama jáne strategııalyq josparlaý departamentiniń basshysy Seıitjan Shalabaevqa, general-maıor sheni QR TJM Azamattyq qorǵanys departamentiniń dırektory Meıram Ysqaqovqa, general-maıor sheni QR Prezıdentiniń Kúzet qyzmeti bastyǵynyń orynbasary Qanat Orazqulovqa tabys etildi.
