Semeılik jas tazy asyraýshy: Itke áýestigim 5 jasymnan bastaldy
ASTANA. KAZINFORM – 11 jasar Ádiljan Jeńis búgin Astanada ótip jatqan ıtter kórmesine arnaıy kelgen. Halyqaralyq kórmege 3 aılyq Shaǵala atty tazysyn qatystyryp jatyr. Kazinform tilshisi jas tazy ustaýshymen áńgimelesken edi.
«Kórmege ákemmen keldim, eki tazy qatysyp jatyr. Bul meniń kúshigim, aty – Shaǵala, týǵanyna 3 aı boldy. Itke áýestigim 5 jasymnan bastaldy, ákemniń qasynda júrip ıtterdiń tilin túsine bastadym. Kórmege Shaǵala kúshigimdi enesimen birge alyp keldik», - dedi Ádiljan Jeńis.
Ádiljan elordadaǵy ıtter kórmesine qatysý úshin arnaıy Semeıden kelgen.
«Úıde 5 tazy bar, olarmen ańshylyqqa shyǵyp turamyz, kóbinese qoıan, qarsaq jáne qus aýlaıdy. Ákemmen ańshylyqqa shyǵyp qyr-syryn áli úırenip júrmin. Tazylarǵa arnaıy tamaq beremiz. Bizdiń tazylar Semeıde ártúrli jarys, sharalarǵa qatysyp júr, Astanaǵa birinshi ret kelip turmyz», - deıdi ol.
Aıta keteıik, búgin Astanada halyqaralyq ıtter kórmesi ótip jatyr.
Іs-sharanyń maqsaty – tazyny qazaqy ıt retinde álemge tanytyp, moıyndatý.
