Semeılik polıtseıler 8 naýryzǵa oraı erekshe fleshmob uıymdastyrdy
ASTANA. KAZINFORM — Halyqaralyq áıelder kúnine oraı Abaı oblysy Polıtsııa departamentiniń qyzmetkerleri Semeı qalasynda merekelik fleshmob ótkizdi, dep habarlaıdy vedomstvonyń baspasóz qyzmeti.
— Qalanyń ortalyq alańynda polıtsııa qyzmetkerleri qyzmettik avtokólikterden Halyqaralyq áıelder kúnine arnalǵan «8» sanyn beınelep, erekshe kompozıtsııa jasady. Bul aktsııa barlyq áıelge degen qurmet pen alǵys belgisi boldy, — delingen PD taratqan aqparatta.
Merekelik shara barysynda polıtsııa qyzmetkerleri qala turǵyndaryna gúl shoqtaryn tartý etip, kóshede kezdesken názik jandylardy quttyqtady. Tártip saqshylary ártúrli jastaǵy áıelderdi — kishkentaı qyzdardan bastap, aıaýly analar men ájelerge deıin quttyqtap shyqty.
Shynaıy kúlki, jyly lebizder men kóterińki kóńil-kúı merekeniń erekshe atmosferasyn qalyptastyrdy. Mundaı erekshe fleshmob áıelderge degen qurmet pen alǵystyń taǵy bir jarqyn belgisine aınaldy.
Abaı oblysynyń polıtseıleri barsha názik jandylarǵa zor densaýlyq, baqyt, amandyq jáne kóktemgi shýaqty kóńil-kúı tileıdi.
Osyǵan deıin Abaı oblysynda taǵy bir aýyl ishimdikten bas tartqanyn jazǵanbyz.
