Semeılik órt sóndirýshi áıeldi janyp jatqan páterden alyp shyqty
SEMEI. KAZINFORM - Búgin saǵat 18:10-da Bezymıannaıa kóshesinde kópqabatty úıde órt shyqqany týraly habarlama kelip tústi, dep habarlaıdy QR Tótenshe jaǵdaılar departamentiniń baspasóz qyzmeti.
Baspasóz qyzmetiniń habarlaýynsha, órt sóndirý bólimsheleri oqıǵa ornyna kelgende 10 qabatty turǵyn úıdiń 8-qabatyndaǵy páterde 5 sharshy metr alańda jıhaz janǵany anyqtaldy.
Semeı qalasynyń № 5 órt sóndirý bóliminiń qaraýyl bastyǵy azamattyq qorǵaý leıtenanty Álibek Tursynbekov janyp jatqan páterden 1969 jyly týǵan áıeldi alyp shyǵyp, 103 qyzmetine tapsyrdy.
Sonymen qatar, TJD kúshterimen baspaldaq arqyly tútindi ǵımarattan qutqarý qalpaqtaryn paıdalanyp 20 adam, onyń ishinde 3 bala qutqaryldy.
«Órttiń sebebi anyqtalýda. Órt saǵat 18.36-da tolyǵymen sóndirildi. Sóndirý jumystaryna barlyǵy 13 adam jáne 4 tehnıka jumyldyryldy»,-delingen habarlamada.
