Semeılik oqýshylar Qunanbaı aýylynyń vırtýaldy álemin jasap shyǵardy
SEMEI. KAZINFORM — Abaı oblysynda mekteptiń 9-synyp túlekteri 3D kózildirik arqyly Qunanbaı aýylyna saıahat jasaýǵa múmkindik beretin joba jasady.
Abaı atyndaǵy mamandandyrylǵan mektep-gımnazııa ınternatynyń 9-synyp túlekteri Arsen Qabdeshev pen Aılat Dýlatuly zaman talabyna saı etip «Qunanbaı aýyly» vırtýaldy jobasyn jasap shyǵardy.
Tarıh pen aýyl mádenıetin búgingi óskeleń urpaqqa jáne ózge ult ókilderine dáripteý maqsatynda jasalǵan vırtýaldy aýylǵa ený úshin kózildirikti taǵý kerek.
Vırtýaldy aýylda Qaraýyl tóbe beınelengen. 19 kıiz úı tigilgen. Kıiz úı syrtynda altybaqan ornatylǵan.
«Kózildirik arqyly kıiz úı ishinen qazaq halqynyń turmys-tirshiliginen habar beretin zattardy kórýge bolady. Tórge ilingen qara dombyra, qyzdyń jıǵan júgindeı bolǵan quraq kórpeler, ulttyq oıýmen órnektelgen sandyqtardy kózildirik arqyly jaqynnan kórip, kózaıym bola alady. Dombyra, qylysh, ydystardy qolmen ustap kórý múmkindigi bar. Joba arqyly oqýshylar vızýaldy álemdegi obektilerdi qolmen ustap, ornynan qozǵaı alady», — deıdi oqýshylardyń jetekshisi, ınformatıka pániniń muǵalimi Bekzat Arashev.
Bul vırtýaldy aýyldy Arsen Qabdeshev pen Aılat Dýlatuly ózderinen keıingi oqýshylarǵa sabaqtarda paıdalanýǵa qaldyrmaq.
3D modeldeý, tarıh, ádebıet sabaqtarynda muǵalimder men oqýshylar qoldanady.
Sondaı-aq bul joba maýsym aıynda Qunanbaı Óskenbaıulynyń týǵanyna 220 jyl tolýyna oraı ótetin is-sharaǵa arnalyp jasalǵan.
Abaı oblysy bilim basqarmasy baspasóz qyzmetiniń málimetinshe, jobanyń 3D maketteri Blender programmasynda jasalyp, Unity programmasy arqyly aýyl ishinde jáne qazaq úıdiń ishinde qozǵalyp júrý úshin teleport qosyldy.
Úı ishindegi zattardy qolmen ustap kórý úshin fızıka kiriktirildi.
Buǵan deıin avtorlar Ekinshi dúnıejúzilik soǵysta qoldanylǵan qarý-jaraq pen áskerı tehnıka maketteri ornalasqan vırtýaldy murajaı jasaǵan.
Sondaı-aq «Jıdebaıǵa vırtýaldy saıahat», «Vırtýaldy qazaq úı» jobalaryn da iske asyrdy.
