Semeılik muǵalim shyrsha bezendirý kezinde jaraqat alǵan

ASTANA. KAZINFORM — Bul týraly Oqý-aǵartý mınıstri Ǵanı Beısembaev Facebook-tegi paraqshasynda málim etti.

Ǵanı Beısembaev bul oqıǵaǵa baılanysty oblys basshylyǵy ádil ári jan-jaqty tekserý júrgizý kerek ekenin aıtty.

— Semeı qalasynda muǵalimderdi jańajyldyq shyrshany bezendirýge tartý jáne áriptesimizdiń osy is barysynda jaraqat alýy — zań buzýshylyqtyń aıqyn kórinisi. Pedagogterdi kásibı mindetterine jatpaıtyn mundaı jumystarǵa tartý — «Pedagog mártebesi týraly» zańdy óreskel buzý dep sanaımyn. Bul oqıǵaǵa baılanysty oblys basshylyǵy ádil ári jan-jaqty tekserý júrgizip, aldaǵy ýaqytta mundaı keleńsizdikterdiń qaıtalanýyna jol bermeý úshin tıisti sharalar qabyldaıdy dep úmittenemin, — dep jazdy ol.

Vedomstvo basshysy bilim basqarmalary men bólim basshylaryna qatań eskertý jasap, atalmysh oqıǵa erekshe baqylaýǵa alynǵanyn aıtty. Sondaı-aq, zardap shekken ustazǵa tezirek saýyǵyp ketýin tiledi.

— Memleket basshysy pedagogterdiń qoǵamdaǵy róline erekshe mán berip, olardyń quqyqtarynyń «Pedagog mártebesi týraly» zań aıasynda qatań saqtalýyn árdaıym nazarda ustap keledi. Osy oraıda bilim basqarmalary men bólim basshylaryna zań talaptaryn qatań oryndaýǵa erekshe nazar aýdarýdy eskertemin. Qýat Aıtqalıevtiń otbasyna shynaıy qoldaý bildire otyryp, onyń tezirek saýyǵýyn tileımin. Qazirgi ýaqytta oǵan barlyq qajetti medıtsınalyq kómek kórsetilip jatyr. Bul jaǵdaı erekshe baqylaýǵa alyndy, — dep túıindedi mınıstr.

Aıta keteıik, buǵan deıin Semeıde shyrsha jaǵý saltanaty nelikten keshiktirilip jatqany aıtyldy.