Semeılik IT-mektep Astanadaǵy baıqaýda úzdik áleýmettik joba bolyp tanyldy
ASTANA. KAZINFORM — «Jyldyń úzdik áleýmettik jobasy» nomınatsııasynda KAZ Minerals kompanııasy Semeı qalasynda salǵan jańa mektep jeńimpaz atandy.
2024 jyly ashylǵan atalǵan IT-mektep-lıtseı 1800 oqýshyǵa arnalǵan. KAZ Minerals Toby mektep qurylysyna 10 mıllıard teńge kóleminde ınvestıtsııa saldy. Joba bir jyl ishinde júzege asyryldy.
— Bul adam kapıtalyn damytýǵa arnalǵan strategııamyzdyń mańyzdy kezeńi. Biz tájirıbeden ótkizý, qaıta daıarlaý jáne mektepterdi bar qajettilikpen qamtamasyz etý arqyly bilim berý salasyn kópten qoldap kelemiz. Jańa lıtseı jalpy bilim berý talabyna saı, — deıdi «KAZ Minerals Management» JShS basqarma tóraǵasy Eldar Mamedov.
Mektep Semeıdegi buryn oqý orny bolmaǵan aýdanda turǵyzylǵan.
— Biz tolyq jabdyqtalǵan, zaman talabyna saı damý keńistigin ashtyq. Bul balalardyń jarqyn bolashaǵy men aımaqtaǵy ómir sapasyn arttyrýǵa qosylǵan úles ekenine senimdimiz. Eńbegimizdiń elengeni qýantady, — deıdi Eldar Mamedov.
Oqý ornynda ınformatıkalyq, mýltımedıalyq bólmeler, zerthanalar, sheberhanalar men eńbek jáne kýlınarııaǵa arnalǵan jalpy sany 48 kabınet bar. Mektepte ınklıýzıvtik talaptary eskerilgen.
KAZ Minerals ókilderi budan bólek «Jyl tálimgeri» jáne «Jyl shahteri» nomınatsııalarynda da usynylǵan bolatyn.
— Bul men úshin úlken mártebe. Áriptesterim men barlyq kenshilerge rahmet! Barshańyzǵa densaýlyq pen eńbek qaýipsizdigin tileımin, — deıdi «Jyl shahteri» nomınatsııasynda jeńiske jetken Ertis kenishiniń burǵylaýshysy Tımýr Serikpaev.
«Jyl tálimgeri» nomınatsııasynda Aqtoǵaı ken baıytý fabrıkasynyń flotatory Kúlken Dagılova úzdik atandy. Qazirgi ýaqytta onyń shákirtteri saladaǵy basshylyq qyzmetterdi atqarady.