Semeılik alaıaq halyqqa páter alýǵa kómektesemin dep 20 mln teńgeden asa paıda tapqan

SEMEI. KAZINFORM — Semeı qalasynyń polıtsııa qyzmetkerleri páter alýǵa kómektesemin dep halyqty aldaǵan 56 jastaǵy jergilikti turǵyndy ustady.

Oblystyq polıtsııa departamentiniń málimetine súıensek, áıel adam turǵyndardy áńgimege tartyp, arzanǵa úı alýǵa kómektese alatynyn aıtqan. Osylaısha, ózine sengen jábirlenýshilerden iri kólemdegi aqsha qarajatyn bank shottaryna aýdartqan.

— Tergeý barysynda birneshe adamnyń aldanyp qalǵany belgili boldy. Úrjar aýdanynyń 32 jastaǵy turǵyny alaıaqqa 8 500 000 teńge aýdarǵan. Al 55 jastaǵy semeılik 3 250 000 teńgesinen aıyrylǵan. Sondaı-aq 56 jastaǵy taǵy bir qala turǵyny 9 000 000 teńge bergen. Osylaısha, áıel 20 mln teńgeden astam paıda kórgen, — delingen aqparatta.

Barlyq epızod boıynsha kúdikti óz kinásin moıyndap otyr. Alaıda qarajatty jeke qajettilikterine jumsap jibergendikten aqshany tárkileý múmkin bolmady. 

— Qazirgi ýaqytta kúdikti ýaqytsha ustaý ızolıatoryna qamaldy. Qylmystyq istiń barlyq mán-jaıyn anyqtaýǵa baǵyttalǵan tergeý áreketteri jalǵasyp jatyr, — delingen habarlamada.

Eske salsaq, osyǵan deıin aqmolalyqtar júrgizýshi kýáligin qalpyna keltiremin degen alaıaqqa aldanyp qalǵany jaıly habarlanǵan.