Semeıliktiń kóligindegi boks tulybynan marıhýana tabyldy

SEMEI. QazAqparat - Semeılik polıtseıler qalaǵa iri mólsherde esirtki jetkizý arnasynyń jolyn kesti, dep habarlaıdy QazAqparat ShQO Polıtsııa departamentiniń baspasóz qyzmetine silteme jasap.

Polıtsııa qyzmetkerleri Semeı qalasyna esirtki zattaryn zańsyz jetkizý jáne ótkizýdi júzege asyratyn qylmystyq istiń fıgýranttaryn anyqtap, ustady. Naýryz aıynyń basynda úsh adam iri mólsherde ótkizýge arnalǵan esirtki alǵany belgili boldy.

Keıin Semeı qalasynan shyǵa beriste 27 jastaǵy kúdikti ustaldy. Onyń kóligin tintý kezinde júksalǵyshtan boks tulyby tabyldy. Onyń ishinde jasyl tústi shóp bolǵan.

Júrgizilgen saraptama shóptiń salmaǵy 44 keliden asatyn keptirilgen marıhýana ekenin kórsetti. Sol kúni Semeı qalasynda 28 jastaǵy kúdikti er adam ustalyp, onyń mashınasyn tintý barysynda 555 doza (2,7 keliden astam) esirtki zaty tabylyp, tárkilendi.

Qazirgi ýaqytta 1989, 1991 jáne 1992 jylǵy úsh kúdikti ustalyp ýaqytsha ustaý ızolıatoryna qamaldy.

Osy is boınysha QR Qylmystyq kodeksiniń 297-baby «Esirtki zattaryn ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý» boıynsha sotqa deıingi óndiris bastaldy.