Semeılikterge ushaq pen poıyz bıletine jeńildik beriletindigi jalǵan
ASTANA. QazAqparat - Burynǵy Semeı oblysynyń aýmaǵynda dúnıege kelgen azamattarǵa ushaq pen poıyz bıletin alýǵa jeńildigi bar kýálik beriletindigi týraly aqparat jalǵan. Bul jaıynda QR Eńbek jáne halyqty áleýmettik qorǵaý mınıstrliginen málim etti, dep habarlaıdy QazAqparat tilshisi.
"Qazaqstan Respýblıkasynyń Eńbek jáne halyqty áleýmettik qorǵaý mınıstrligi WhatsApp pen elektrondy poshta arqyly taraǵan Semeı ıadrolyq synaq polıgonyna irgeles aýmaqtaǵy ıadrolyq synaqtan zardap shekkenderge qalaaralyq baǵytta tegin jol júrýge múmkindigi bar kýáliktiń beriletindigine qatysty aqparattyń jalǵan ekendigin taǵy da eskertedi", - dep atap ótedi mınıstrlikten.
Qazaqstan Respýblıkasynyń 1992 jylǵy 18 jeltoqsandaǵy "Semeı ıadrolyq synaq polıgonyndaǵy ıadrolyq synaqtardyń saldarynan zardap shekken azamattardy áleýmettik qorǵaý týraly" Zańynyń 11 babyna sáıkes 1949-1990 jyldary aralyǵynda Semeı ıadrolyq synaq polıgonyna irleges aýmaqtaǵy ıadrolyq synaqtan zardap shekkender atalǵan zańda kózdelgen jeńildikter men ótemaqy alýǵa quqyq beriletin kýálik alǵan. Osy ýaqytqa deıin ıadrolyq synaq saldarynan zardap shekken shamamen 1,1 mln adamǵa birjolǵy aqshalaı ótemaqy tólendi. Tólengen ótemaqy kólemi 16,1 mlrd teńgeni quraıdy.
Munan bólek, radıatsııalyq táýekel aýmaǵynda turatyn halyqtyń atalǵan Zańǵa sáıkes jalaqylaryna qosymsha tólemaqy alýǵa jáne jyl saıyn tólenetin qosymsha demalys alýǵa quqyǵy bar.
Sonymen qatar "QR-daǵy zeınetaqymen qamtamasyz etý týraly" Zańǵa sáıkes 1949 jyldyń 29 tamyzy men 1963 jyldyń 5 shildesi aralyǵynda keminde 5 jyl tótenshe jáne barynsha radıatsııalyq qaýpi bar aýmaqta turǵan er-azamattar 50, al áıelder 45 jasta jeńildikpen zeınetkerlikke shyǵýǵa quqyly.
Aıta keteıik, áleýmettik jelide burynǵy Semeı oblysynyń aýmaǵynda dúnıege kelgen azamattarǵa kólik pen ushaq bıletin satyp alýǵa jeńildik beretin jáne jylyna bir ret emhanada tegin emdelýge múmkindik jasaıtyn kýálikter Halyqqa qyzmet kórsetý ortalyqtarynan berilip jatqandyǵy týraly aqparat taraǵan edi.
