Semeılikter ıadrolyq synaqtan zardap shekkenderdi eske aldy
«Beıbitshilik» aktsııasy Semeıde 2009 jyldyń 29 tamyzynan beri ótýde. Bıylǵy sharaǵa 10 myńǵa jýyq adam qatysty. Qala basshysy Ermak Sálimov, Japonııadan kelgen ǵalymdar, Hırosıma ýnıversıtetiniń professory Masaharý Hoshı, qoǵamdyq uıymdar jáne qalanyń etnomádenı ortalyqtarynyń ókilderi jınaldy. Shaqyrylǵan meımandar «Ólimnen de kúshti» monýmentine gúl shoqtaryn qoıyp, ıadrolyq synaq zardaptarynan japa shekkenderdi 1 mınýt únsizdikpen eske aldy.
«29 tamyz - barlyq qazaqstandyqtar úshin mańyzdy kún. 27 jyl buryn Prezıdent Nursultan Nazarbaev Semeı ıadrolyq polıgonyn jabý týraly túbegeıli sheshim qabyldady. Biz ıadrolyq qarýsyzdaný úderisine jáne beıbitshilik pen turaqtylyqty qamtamasyz etýge birinshi bolyp úles qosqan Prezıdentimizdi erekshe maqtan tutamyz. Búginde bul beıbit bastama álemniń kóptegen elderinde qoldaý tapty. Bizdiń mindetimiz - ıadrolyq qarýsyz álemdegi Qazaqstannyń ıdeıasyn saqtaý jáne arttyrý», - dedi qala basshysy Ermak Sálimov.
Jıynda sóz alǵan Hırosıma ýnıversıtetiniń professory Masaharý Hoshı toqtaýsyz júrgizilgen atom jarylystarynyń zardaptary áli kúnge deıin halyq densaýlyǵyna keri áser etýde ekenin jetkizdi. Búginde eki el ǵalymdary júrgizip jatqan ǵylymı-zertteý jumystary elimizdegi medıtsınany, radıatsııa, ekologııany jaqsartýǵa úles qosatynyn aıtty.
«Semeıdegi Medıtsına ýnıversıtetimen birlese jumys atqaryp kele jatqanymyzǵa 20 jyldaı ýaqyt boldy. Aımaqtaǵy radıatsııalyq medıtsına jáne ekologııa salasynda birlesken zertteýler júrgizip, ekologııalyq problemalardy zerdeleý, synaqtan zardap shekken turǵyndardyń densaýlyǵyn jaqsartý maqsatynda jumys istep jatyrmyz. Jáne biz múmkindigimizshe qaıyrymdylyq kómek kórsetýdemiz. Ásirese, qan azdyq jáne leıkemııa aýrýyna shaldyqqan balalarǵa dári-dármekpen járdem ettik. Qazaqstan men Japonııa eliniń dosytǵy odan ári nyǵaıa beredi degen senimdemin», - dedi Masaharý Hoshı.
