Semeılikter Elbasy bastamasyn talqylady
SEMEI. QazAqparat - Semeılikter Elbasynyń «Bes áleýmettik bastama» baǵdarlamasyn talqylady. Qala jurtshylyǵynyń qatysýymen ótken jıynda turǵyn úı satyp alýdyń jańa múmkindikteri men jataqhana máselesi talqylandy, dep habarlaıdy QazAqparat.
Jıynǵa Semeı qalasy ákiminiń orynbasarlary Nadejda Sharova men Nıkolaı Ýshakov, Tehnıkalyq jane kásiptik bilim berý júıesiniń óńirlik Keńesiniń tóraǵasy Oralhan Sartaev, ishki saıasat bóliminiń basshysy Aıdar Sadyrbaev, Semeı qalasy boıynsha memlekettik kirister basqarmasynyń zań qyzmeti jáne salyq zańnamasyna túsinikteme berý bólimi basshysy Shyryn Ámirhanova jáne «Damý» qory fılıalynyń ókili Anastasııa Shestaeva qatysty. Jıynda asa talqylanǵan taqyryp ıpotekalyq turǵyn úı jáne syrttan kelgen stýdentter úshin turǵyn úıdiń qoljetimdiligi boldy.
Qala ákiminiń orynbasary Nıkolaı Ýshakovtyń sózinshe, normatıvtik-quqyqtyq aktilerge ózgertý eńgizý kerek bolǵandyqtan jańa baǵdarlama shilde-tamyz aılarynda ázirlenedi.
«Kóp qabatty turǵyn úıdiń qurylysy bizde Qaraǵaıly yqsham aýdanynda júrip jatyr, 43 joba ázirlengen, 6 úı salyndy, 8 úı qurylys barasynda. Barlyǵy 98 kóp qabatty úı, áleýmettik jáne mádenı obektiler qurylysyna 147 ga. aýmaq bólingen»,-dedi ol.
Sondaı-aq, Semeıde stýdentter úshin jataqhana máselesi ózekti. TjKB júıesiniń óńirlik Keńesiniń tóraǵasy Oralhan Sartaevtyń aıtýynsha, qazirde qaladaǵy jataqhanalardyń birazy paıdalanylmaǵandyqtan qalanyń kóptegen kolledjderi jataqhanasyz qalǵan.
«Mysalǵa, Elektrotehnıkalyq kolledj ǵımaraty buzylǵan, al Mýzykalyq jáne Bıznes-kolledj jataqhanasy qonaqúıge aınalǵan»,-dedi Oralhan Sartaev.
Búgingi kúni Semeıde 16 myń stýdent basqa qalalardan kelip bilim alyp jatqan kórinedi. Solardyń tek 20% ǵana jataqhanada turady. Al qalǵandary týystarynyń úıinde, páter nemese bólme jaldap turýǵa májbúr. Sondyqtan jańa jataqhana salý, eski ǵımarattardy qaıtarý nemese qaıta jańartý jumystary qolǵa alynbaq.
