Semeılik jas jubaılar toı ornyna jetim balalarǵa tartý jasady
Jas jubaılar ómirindegi umytylmas kúnderin ata-ana qamqorlyǵynsyz qalǵan balalarǵa arnady. Olar qala syrtyndaǵy «Orbıta» lagerine barǵan. Kúıeý jigit pen qalyńdyq osylaısha meıramhanada dúrkiretip toı jasap, lımýzın jaldap mingennen góri saýapty iske muryndyq bolǵandy jón kóripti. Tipti Altynaı qalyńdyq kóılegi men jelek te satyp almaǵan. Bul oı jastarǵa qyz ben jigit bolyp júrgende kelgen eken. Ol kezde stýdent bolatyn. Araǵa 7 jyl salyp, qos ǵashyq otbasyly bolýǵa sheshim qabyldaǵan ýaqytta oılaryn júzege asyrǵan. Eki jaqtyń ata-anasy da jastardyń usynysyna qoldaý bildirip, qarsylyq tanytpaǵan.
«Ata-analarymyz qarsy bolǵan joq. Árıne, toı jasaýǵa jaǵdaıymyz jetedi. Biraq biz birneshe saǵattyq toı-dýmannan góri ózgege paıdamyz tıetin qaıyrymdylyq is jasaǵymyz keldi. Sebebi, kópshiligi mundaı jasaı bermeıdi. Balalar úıinde tárbıelenip jatqandardyń rııasyz kúlkilerin estigende naǵyz baqyttyń ne ekenin túsindik»,-deıdi Nursultan.
Jas jubaılar 114 balaǵa merekelik dastarhan jaıyp, 3 saǵatqa anımatorlardy jaldap, balalardyń kóńilin kóterý úshin arnaıy oıyn-saýyq baǵdarlamasyn uıymdastyrǵan. Jáne 5-17 jas aralyǵyndaǵy balalarǵa aıaq kıimderdi syıǵa tartty.
Dúrkiregen toı bolmasa da qalyńdyqty qazaqtyń salt-dástúrimen uzatyp alǵan. Qudalyq, syrǵa salý, otqa maı tamyzý syndy dástúrler oryndalyp, meshitte nekelerin qıdyrǵan. Al keshkisin tek ata-ana, týǵan-týystyń basyn aq dastarhan basynda qosyp, atap ótken.
Búginde Nursultan áskerı salada, jary esepshi bolyp jumys isteıdi. Tipti olardyń qaıyrymdylyq sharasy áleýmettik jelilerde qyzý talqyǵa túsetinin kútpegenin aıtady.
