Semeılik jas shahmatshy Reseıde sensatsııa jasady
NUR-SULTAN. QazAqparat – Semeılik 16 jasar shahmatshy Arystan Isanjolov Búkilreseılik shahmat jarysynda rapıd kezeńi boıynsha altyn medal aldy. Bul týraly QazAqparat Qazaqstan shahmat federatsııasynyń baspasóz qyzmetine silteme jasap habarlaıdy.
Qazaqstan atynan synǵa túsken jalǵyz úmitker Arystan Isanjolov týrnırdiń eń jas qatysýshysy bola otyryp, 122 shahmatshynyń ishinde úzdik atanǵan. Jarysqa qatysýshylar arasynda tájirıbeli grossmeısterler de bolǵan.
«Týrnır bastan-aıaq tartysty ótti. Óte myqty qarsylastar kezdesti. Jarys barysynda 41 orynnan 1-orynǵa shyqtym», – deıdi Arystannyń ózi.
11 týrdan keıin 2124 reıtıng upaıyn jınaǵan Arystan Isanjolov sońǵy kezeńde 2618 reıtıngtik upaıy bar Semen Hanındi jeńgen.
«Ol sondaı-aq, grossmeıster Alekseı Prıdorojnyıdy jeńip, 37 jastaǵy fovorıt, 2683reıtıngtik upaıy bar Dmıtrıı Kokarevpen teń tústi. Árıne, Arystan – talantty shahmatshy. Bóten jerde mundaı jeńiske jetýin sensatsııa dep ataýǵa bolady», - deıdi Qazaqstannyń balalar men jasóspirimder quramasynyń bas bapkeri Ánýar Ismaǵambetov.
Týrnırdiń «kúmisi» penzalyq Dmıtrıı Kokarevke buıyrsa, Qorǵan qalasynan kelgen Andreı Drygalov jarystyń qola júldegeri atanǵan.
