Semeılik ustazdar men oqýshylar Májilis depýtatymen kezdesti
ASTANA. Maýsymnyń 11-i. QazAqparat - QR Parlamenti Májilisiniń depýtaty Nurtaı Sabılıanov Semeı qalasynyń orta mektepteriniń ustazdary jáne oqýshylarymen kezdesti.
Aıta ketý kerek, Sabılıanov myrza muǵalimder men oqýshylardy Astanany, onyń kórkem de ásem oryndaryn, sonyń ishinde halyq qalaýlysynyń jumys orny - Parlament Májilisin kórip qaıtsyn degen oımen shaqyrǵan.
Bul oqıǵa balalarǵa úlken áser etti. Kezdesý barysynda ustazdar, oqýshylar men olardyń ata-analary elordada qandaı ǵajaptardy kórgenin, aldaǵy maqsattary men oılaryn aıtyp berdi. «Men Báıterek keshenin, Prezıdenttik mádenı ortalyǵyn jáne taǵy basqa ásem ǵımarattardy kórgenime baqyttymyn. Maǵan Astanamyz óte unady», - dep 6 synyp oqýshysy Álijan Ánýarbekov óz qýanyshymen bólisti.
Oqýshylar alǵan áserlerin jetkizdi. Ásirese, Otan-Ana monýmentin kórgende boılaryna rýh alǵanyn jetkizdi. Al muǵalimder men ata-analar bir aýyzdan: «Bul sapar balalarǵa tek ǵana kóńildi ári qýanyshty bolyp qana qoıǵan joq, olardyń keleshegine, oı-sanalaryna jáne de azamat bolyp qalyptasýyna zor yqpal etetini sózsiz»,- dedi.
Sonymen qatar, ustazdar depýtatqa arnaıy hatty tabys etip, bilim salasynyń máselelerine kóńil aýdarýyn ótindi.
Kezdesýden keıin Májilis ǵımaraty boıynsha ekskýrsııa ótti. Balalar qos Palatanyń birlesken otyrys zalyn, QR Parlament Májilisiniń jalpy otyrys zalyn, Baspasóz ortalyǵyn jáne depýtattyń jumys kabınetin kórýge múmkindik aldy.
Parlamentshi men balalardyń umytylmas kezdesýi fotosýretke túsýmen jáne izgi nıet bildirýmen aıaqtaldy.
