Semeılik turǵyndar qarjy pıramıdasyna 71 mln teńge salǵan
ÓSKEMEN. QazAqparat - Shyǵys Qazaqstan oblysynyń Memlekettik kirister departamenti Ekonomıkalyq tergeý qyzmeti 2014 jyly qurbysymen birge Aqtóbe qalasynda qarjy pıramıdasyn qurǵan Sh. esimdi azamatshaǵa qatysty qylmystyq isti tergep, sotqa jiberdi. Bul týraly «QazAqparat» HAA tilshisi habarlaıdy.
Aıyptalýshylar «million888som» veb-saıtyn quryp, oǵan asa iri kólemde qarjy quıatyn salymshylardy tartqan.
«Jobanyń sharty mynadaı bolǵan: jeke tulǵalar «profıl» (jobaǵa seriktes retinde qatysýǵa ótinish) toltyryp, Sh. esimdi azamatshanyń bank kartochkasyna baǵdarlamaǵa qatysý úshin qajetti qarajat aýdaryp otyrǵan. Saıtqa tirkelgen adamdar olardy shaqyrǵan adamdardyń artynan sáıkesinshe oryn alǵan. Keıin baǵdarlama qatysýshylary óziniń artynan taǵy eki adam ertip, osylaısha jalǵasyp otyrǵan. Tek qosymsha qatysýshylardy (olardyń sany jeteýden kem bolmaýy kerek) shaqyrǵannan keıin ǵana «jeti oryndyq ústel» qurylǵan. Keıin, sońynan alty adamdy tirkegen adam 180 myń teńge kóleminde syıaqy alyp otyrǵan. Onyń 125 000 teńgesi Sh. esimdi azamatshanyń kartochkalyq shotyna túsip, al qalǵan 55 myń teńge baǵdarlamaǵa ınvestıtsııa retinde quıylyp kelgen», - dep túsindirdi ShQO MKD ETQ bas tergeýshisi Leıla Ysqaqova.
2015 jyly qurbysynyń Aqtóbede kenetten qaza tabýyna qaramastan, Sh. qylmystyq isin jalǵastyra bergen. Ol avtojoba engizý maqsatynda «tulpar.million888.com» web-saıtyn qurǵan. Osylaısha, alaıaq áıel «Toıota-Korolla» markaly jańa kólikti syıǵa tartýǵa ýáde etip, salymshylardy tartyp júrgen.
Tergeý barysynda anyqtalǵandaı, 2014 jyldyń shildesi men 2016 jyldyń tamyzy aralyǵynda Sh. esimdi azamattyń shotyna 71 mln. teńge túsken. Ol 2015 jyly ózin kópshilikke «tulpar.million888som.» kompanııasynyń dırektory retinde tanystyryp úlgergen.
Qalalyq sottyń úkimimen Sh. esimdi azamatsha múlki tárkilenip, 5 jylǵa sottaldy jáne 7 jyl merzimge jeke jáne zańdy tulǵalardan tabys tabý maqsatynda aqsha alý quqyǵynan aıyryldy.
Óńirdegi ekonomıkalyq tergeý qyzmeti turǵyndarǵa abaı bolyp, qarjy pıramıdasy týraly barlyq faktiler boıynsha senim telefonyna habarlasýdy suraıdy.
