Semeılik tártip saqshylary 18 jyl buryn jol polıtsııasy qyzmetkerin óltirgenderdi ustady
ASTANA. Qańtardyń 20-sy. QazAqparat /Aıdar Ospanalıev/ - Semeılik tártip saqshylary osydan 18 jyl buryn polıtsııa qyzmetkeriniń ólimine sebepshi bolǵan qylmystyq isti ashty. Bul týraly búgin aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti,
dep habarlaıdy QazAqparat.
Onyń málimetterinshe, tártip saqshylary Semeı qalasynyń turǵynyn ustap, ol 1992 jyly jol polıtsııasy qyzmetkerin óltirgendigin moıyndaǵan. Sol jyly Semeı qalasynan VAZ avtokóligi urlanyp, kelesi kúni Jol polıtsııasynyń ınspektory Qanat Tegenenov kezekshilikten oralmaǵan. Al osy oqıǵadan soń on kúnnen keıin Ertis ózeninen onyń denesi tabylyp, kisi óltirdi degen aıyppen qylmystyq is qozǵalǵan. «Qańtardyń 15-i kúni tártip saqshylary 42 jasar azamatty ustap, ol polıtsııa qyzmetkeri ólgen kúni óziniń serigimen urlanǵan kólikti minip kele jatqanda ózderin jol polıtsııasynyń qyzmetkeri toqtatqandyǵyn aıtty. Janyndaǵy serigi polıtsııa qyzmetkerin áńgimege aldandyryp turǵanda, qylmysker tártip saqshysyn kólik jóndeýge arnalǵan temirmen bastan uryp qulatqan. Budan soń qylmyskerler ólikti qalanyń syrtyna shyǵaryp, sheshindirip, sýǵa tastaǵan. Qazir osy iske qatysy bolýy múmkin barlyq azamattar anyqtalyp, jaýap alynýda», dedi departament bastyǵy.
Sondaı-aq onyń aıtýynsha, ótken jyly jeltoqsan aıynyń 20-ynda Qaraǵandy qalasynyń ortalyq polıtsııa bóliminiń jedel ýákilin óltirip ketken. Qańtardyń 16-sy kúni osy iske qatysy bolýy múmkin qalanyń úsh turǵyny ustaldy. Olardyń bireýi buryn da birneshe ret sottalǵan bolyp shyqty. Ustalǵandar «Petroleým» túngi klýbynda bolǵan janjaldan soń osyndaı kisi óltirgenderin moıyndaǵan. «Olar jedel ýákildi ózderin qorlaǵan azamatpen shatastyryp, kólikke minip, ańdyǵan jáne polıtsııa qyzmetkerin maı quıý stansylarynyń biriniń janynda óltirgen», dedi Q.Jumanov.
