Semeılik polıtseıler balalar úıiniń tárbıelenýshilerine jańajyldyq syılyqtar tabys etti
SEMEI. QazAqparat – Semeı qalasynyń polıtsııa qyzmetkerleri balalar úıiniń tárbıelenýshilerine jańajyldyq syılyqtar berdi, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetinshe, jańa jyl qarsańynda Áýezov polıtsııa bóliminiń qyzmetkerleri №8 balalar úıine bardy. Tártip saqshylary tárbıelenýshilerdi kele jatqan merekemen quttyqtap, olarǵa syılyqtar, atap aıtqanda sporttyq kıimder, tátti-dámdi salynǵan dorbalar, jemister men oıynshyqtar tabystady. Barlyq syılyqtar Áýezov polıtsııa bólimi qyzmetkerleriniń jeke qarajatyna satyp alynǵan.
«Polıtsııa qyzmetkerleri qaıyrymdylyq sharalaryna belsendi qatysýda. Muqtaj jandarǵa kómek qolyn sozýǵa árkez daıynbyz», - deıdi Semeı qalalyq PB kadr saıasaty bóliminiń bastyǵy Erkebulan Jarkenov.
Polıtseıler 70-ten astam balany quttyqtady. Búldirshinder men balalar úıiniń basshylyǵy saqshylarǵa alǵystaryn bildirdi.
