Semeılik oqýshynyń zertteý jumysy Reseıden júldemen oraldy
10-synyp oqýshysy «Ǵylym men tehnıkadaǵy jas zertteýshiler» atty zertteý jumystary baıqaýyna «Jelilik erozııa» atty jobasymen qatysty. Ol osy arqyly tıisti sala mamandarynyń nazaryn Borodýlıha aýdany, Novopokrovka aýylyndaǵy jyralardyń paıda bolýy men onyń qorshaǵan ortaǵa tıgizetin áserine aýdarǵysy kelgen. Jobany qorǵaý úshin oqýshy bir jyl boıy zertteý júrgizgen. Eki márte Novopokrovka aýylyna baryp, aýyldaǵy jyralardyń jylyna 10-40 metr aralyǵynda keńeıip kele jatqanyn ańǵarǵan.
«Bul óz kezeginde sol aýyldaǵy ǵımarattarǵa, aǵashtarǵa, qudyqtarǵa keri áser etip, olardy qıratady. Odan bólek, joldyń búlinýi men egistik alqaptardyń zaqymdanýyna da yqpal etpeı qoımaıdy. Qarap otyrsańyz, tabıǵatqa, tipti adam ómirine de qaýip tóndiretin jaıt. Sondyqtan buǵan beı-jaı qaramaýymyz kerek. Zertteý jumystarynyń qorytyndysy boıynsha ǵylymı keńesshim «Semeıgıdrogeologııa» JShS-niń ınjener-gıdrogeology Larısa Gýşına ekeýmiz jergilikti sharýa qojalyqtary basshylaryna qaýip pen orasan shyǵynnyń aldyn-alý týraly eskerttik. Endigi jumys solardyń enshisinde», - deıdi jas tabıǵat janashyry Rıshat Meıirjanuly. 
Reseıdiń Tomsk qalasynda ótken konferentsııa-baıqaýǵa 300-den asa oqýshy qatysyp, túrli taqyryptarda óz jobasyn qorǵaǵan. Sonyń arasynda Rıshattyń eńbegi joǵary baǵalanyp, birinshi orynǵa ıe boldy
Geografııa pánin súıip oqyp, tabıǵat qubylystaryna qyzyǵatyn oqýshy jeńiske jetýine mekteptiń geografııa páni muǵalimi Sharıpa Talaspaeva men hımııa pániniń muǵalimi Jazıra Qurmanovalardyń kóp kómegi tıgenin atap ótti.
Rıshat jeńiske jetý arqyly keler jyly Reseı astanasy Máskeý qalasynda ótetin halyqaralyq V.Vernadskıı konferentsııasyna shaqyrtý aldy.