Semeılik oqýshylar jel generatorynyń jańa túrin oılap tapty
Jas ónertapqyshtar, osy arqyly balamaly energetıkany damytýdy kózdeýde. Naqtyraq aıtqanda, Zııatkerlik mekteptiń oqýshylary óz tabystaryn qalanyń ınfraqurylymyna engizbek nıette. Bul dástúrli qýat kózderinen anaǵurlym tıimdi, sondaı-aq ekologııaǵa da zalal keltirmeıdi dedi semeılik ınnovatorlar. Áıtse de onyń artyqshylyǵy munymen ǵana shektelmeıdi.
«Fızıka sabaǵynda jańa taqyrypty ótken soń, Nurjan ekeýimizge bir oı keldi. Nege jel generatorynyń tıimdiligi men paıdaly áser koeffıtsıentin arttyrmasqa? Ol úshin Bernýlı jáne aerodınamıka zańdaryn negizge aldyq. Jańa qurylymynyń erekshelikterin paıdalaný arqyly jeldiń jyldamdyǵyn kóbeıttik. Osyılasha onyń aınalym sany joǵarylaı tústi. Búgingi qoldanystaǵy jel generatorlary vertıkaldi, ıaǵnı tik kúıinde ornatylady. Sonyń saldarynan ony jeldiń baǵytyna qaraı aýystyryp otyrý qajet. Bizdiń ónertabysymyz kez kelgen ǵımarattyń ústine qoıylady jáne energııany óndirý úshin ony aınaldyrý kerek emes. Ol 360 gradýsta jumys isteı beredi», - dep atap ótti Semeı qalasyndaǵy fızıka-matematıkalyq baǵytyndaǵy NZM-niń 12-shi synyp oqýshysy Muhammedáli Ibragım.
Jasyratyny joq, qazirgi jel elektr stantsııalarynyń paıdasymen birge zııany da bar. Máselen, atalmysh qondyrǵylar qýatty óndirýmen qatar ýltradybysty da shyǵarady eken. Al bul óz kezeginde tiri aǵzalarǵa keri áserin tıgizbeı qoımaıdy. Mundaı qorytyndyny japondyq ǵalymdar shyǵarǵan. Osyny eskergen jas entýzıastar, generatordyń syrtyn plastıkalyq materıalmen qaptaǵan. Nátıjesinde ýltradybys qondyrǵynyń ishinde saqtalady. Onyń ústine jel elektr ortalyqtary ashyq bolǵan soń, oǵan qustardyń soqtyǵýy bek múmkin. Sol sebepti Muhammedáli men Nurjan, generatorǵa arnaıy tordy ornatypty.
«Osydan bólek, «Smart» júıege baılanysty taǵy bir jumysty pysyqtap jatyrmyz. Atap aıtsaq, smartfonnyń jaryǵymen úıdiń ishindegi teledıdardy, shamdy jáne taǵy da basqa turmystyq zattardy iske qosatyn qosymshany daıyndaýdy kiristik», - dedi Nurjan Bódes.
